Lista sa gi-blacklist nga kontraktor gipangayo

 CEBU, Philippines - Ang hunta probinsiyal sa Sugbu mihangyo sa World Bank(WB) nga mobulontaryo kini pagtunol sa ilang listahan ngadto sa senado sa na-blacklisted nga mga kontraktor sa mga proyekto dinhi sa nasud ng gigastohan sa maong bangko.

Si Provincial Board member Victor Maambong mitumbok sa iyang gipalabang nga resulosyon nga ang mga walhon nagtuo nga ang WB kusog kaayo mopautang og kuwarta sa kagamhanan sa nasud aron ipaburot sa bulsa sa mga kurakot nga mga opisyal sa gobyerno unya ang tanang Pilipno maoy magbayad sa maong utang.

Apan matud pa ni Maambong nga ang maong pagtuo gibaraw sa mga opisyal sa kagamhanan kinsa nagkanayon nga ang WB naningkamot usab nga maundang na ang mga pangurakot nga naghitak sa nasud karong panahona.

Gani gipakita sa WB ang maong prinsipyo pinaagi sa pagsuporta sa imbistigasyong gilusad sa senado batok niadtong mga tawo nga nahilambigit sa pagbulsa sa binilyon ka pesos nga gipautang sa WB sa nasud.

Gidayeg ni Maambong ang lakang sa WB tungod kay usa sa gitumbok ug giingong nangayo og 20 porsiyento nga bahin gikan sa mga gi-blacklist nga mga kontraktor mao man si First Gentleman Mike Arroyo.

Apan nagdumili kini sa paghatag sa mga dokumento ngadto sa senado tungod kay gigamit niini ang Doctrine of State Immunity nga dili makapanghilabot ang kagamhanan sa Pilipinas sa mga International Organization sama sa WB.

Tungod niini giawhag ni Maambong ang WB nga mohatag sa mga dokumento, ilabina sa listahan sa na-blacklisted nga mga kontraktor nga Pilipino  ngadto sa senado aron magpamatuod sa polisiyang transparency nga gisagop sa bag-ong presidente sa Estados Unidos nga si Barak Obama. - Ches Abadilla (BANAT NEWS)