Bollozos bakakon: Dr. Burden

CEBU, Philippines - Subling gihinganlan ni Dr. Rowena Burden og bakakon ang marketing consultant sa Cebu City Tourism Commission (CCTC) nga si Bruce Bollozos human kini moluwat og mga pamahayag nga nanghunaw sa bisan unsang kalambigitan sa mga bulilyaso sa texters choice award sa Miss Cebu 2009.

Nakontrobersiya ang nahisgutang special award sa dihang lain ang gihatagan niini og dili ang tinuod nga midaog nga si Kimberly Therese Burden, anak sa doktora.

Unang giklaro ni Bollozos nga ang iyang bugtong responsibilidad sa pageant mao nga mamahimong hapsay ug walay sayop ang TV live broadcast sa beauty pageant.

Apan matud ni Dr. Burden nga si Bollozos giingong kabahin sa screening panel ug usa sa mikwestyon kang Kimberly.

Ikaduhang punto nga giklaro ni Bollozos nga siya daling nangayo og pasaylo sa pamilyang Burden human masayod nga siya nasayop paghatag sa pangalan sa winner.

Apan matud sa doktora nga namakak na usab si Bollozos tungod kay wala sila mahinumdom nga dunay nangayo kanila og pasaylo human sa bulilyaso.

“Kamaayo gud niya, maingon ba diay mi niini kun duna pay nangayo og pasaylo namo unya ilang gikurihean ang ilang nahimong sayop,” sumala pa ni Dr. Burden.

Ikatulong giklaro ni Bollozos nga wala sila mosulti kun unsa nga phone model ang ihatag sa winner sa texters choice award.

Apan matud ni Dr. Burden nga misamot ang pagkabakakon ni Bollozos tungod kay daan nang gipahibalo ang mga kandidata sa premyo gawas nga sila dunay video niini.

Gani ang OIC sa CCTC nga si Cinbeth Orellano una nang mikompirmar nga Samsung Omnia ang premyo nga cellphone ug mipahimug-at sa giingong pamakak ni Bollozos.

Nakatawa na lang si Dr. Burden sa dihang ang abogado ni Bollozos mihulagway sa iyang kliyente nga usa usab ka biktima sa nahisgutang kontrobersiya.

Hagit ni Dr. Burden kang Bollozos nga mosulti sa kamatuoran, sa tanang nahibaw-an niini ug dili ipasulabi ang pagpamakak.

“He should come out and tell everything he knows, dili pwede nga maghadla-hadla ba. Mao ra man ang point ana, isulti ang tinuod niyang nahibaw-an,” matud ni Dr. Burden. - Elly Bolonos (BANAT NEWS)