CAIB mohigpit sa mga salida sa sine

CEBU, Philippines - Ipatuman na sa Cebu City Anti-Indecency Board (CAIB) sugod sa sunod semana ang bag-ong guidelines sa Movie and Television Review Classification Board (MTRCB).

Kini mao ang pagdili sa mga sinehan sa dakbayan nga makapasalida sa gi-klasipikar sa MTRCB nga R-18 kung walay ikapakita nga Certificate/Permit to Exhibit.

Matud ni CAIB Chairman Doctor Rene Josef Bullecer nga isip implementing arm sa MTRCB dinhi sa siyudad ila nang ipatuman ang bag-ong kamanduan niini.

Nagkanayon si Bullecer nga kung makapakita na sa certificate/permit to exhibit ang usa ka sinehan, ila usab nga i-review ang pelikula niini nga ipasalida.

Kini aron masusi kung wala ba ibalik pagsumpay ang mga eksena sa pelikula nga giputol human sa gihimong pag-review sa MTRCB niini.

“Mao na ang gihangyo sa MTRCB namo sa CAIB nga one day before sa showing sa Cebu, kay Wednesday man dinhi mag-change program ang mga sinehan nga as early as Monday ihatag na sa mga tag-iya niini ngadto sa CAIB ang ilang kopya sa aprubadong certificate/permit to exhibit aron amo dayon nga ma-review,” sumala ni Bullecer.

Kung sila walay makitang kausaban, miingon si Bullecer nga kini ila dayong silyuhan ug dinhi pa mahimong ipasalida sa mga sinehan ang pelikula.

Duha lang hinuon ka sinehan dinhi sa dakbayan ang nahibaw-an sa Banat News nga kanunay mopasalida og mga pelikula nga dunay R-18 classification sa MTRCB.

Nagkanayon si Bullecer nga kadtong mga sinehan nga mapakyas pagpakita kanila og certificate/permit to exhibit, mag-atubang unya og multa sibo usab sa nalatid sa Presidential Decree 1986, ang balaud nga nagmugna sa MTRCB.

Gawas niini miingon si Bullecer nga mahimo usab nilang ipahamtang sa mga sinehan ang multa nga nalatid sa City Ordinance 1408 kon ang Anti-Indecency Ordinance sa siyudad. - BANAT NEWS