Kap. Lim mo-mosyon sa kaso

CEBU, Philippines -  Dili yanong buhian ni Kapitan Danilo Lim sa Poblacion Pardo ang iyang katungdanan bisan pa man kun gibasura na sa Comelec ang iyang pag-apelar sa election protest nga gisang-at sa iyang gikaatbang sa miaging barangay election nga si Fermin Dasmariñas.

Ang Comelec first division mibasura sa appeal nga giduso ni Lim labot sa court decision nga nagdeklarar kang Dasmariñas nga mananaog sa miaging piniliay sa barangay.

Kini tungod usab sa kapakyas sa kapitan pagsumiter sa iyang “appeal brief” nga gipangita sa Comelec sulod sa 30 ka adlaw.

Ang kapitan mipadayag og kasagmuyo sa desisyon sa Comelec tungod kay giingong gibasura ang iyang appeal tungod lang sa teknikalidad.

“Maayo unta og gibasura kun base pa sa merito sa kaso unya dili man, so, labing siguro nga mosang-at mi ana og mosyon,” sumala ni Lim.

Nagkanayon ang kapitan nga siya makigkita pa sa iyang abogado nga si Atty. Ervin Estandarte alang sa sunod nilang lakang nga himuon. -Elly Bolonos (BANAT NEWS)