BOC nakaigo sa target collection

CEBU, Philippines - Ang kalampusan sa pagkab-ot sa ilang tinuig nga target nga koleksiyon alang sa tuig 2008 gikalipay pag-ayo ni Cebu Customs District Collector Ricardo Belmonte atol sa kasaulogan sa iyang ika-60 nga kasumaran sa adlaw’ng natawhan sa milabay’ng adlaw.

Sa iyang birthday, gipasalamatan ni Belmonte ang iyang mga kawani kay nakab-ot gyud nila ang ilang collection target nga P5 bilyones sa miaging tuig.

Napanid-an sa kadaghanan nga mao rag gidebuenas ang BOC kay gani bisan sa buwan pa lang sa Enero ning tuiga 2009, nakuha na nila ang ilang gitarget nga koleksyon nga balig P400 milyones ug gani milamwas niini ang ilang aktuwal nga nakolekta nga mikabat sa P428 milyones.

Alang kang Belmonte usa kini ka maayong regalo sa kasuraman sa iyang adlaw’ng natawhan gikan sa mga sakop sa economic team sa BOC Cebu.

Tungod niini gipangandoy ni Belmonte nga imentinar unta sa iyang mga tawo ang kakugi ug paningkamot aron nga makab-ot gayud nila ang gitahas kanilang koleksyon matag buwan ug ang P6 bilyones nga ilang target nga kolektahonon ning tuiga.

Si Belmonte kinsa makatulo na ka higayong nagsaulog sa iyang birthday dinhi sa Sugbo sukad siya madestino dinhi niadtong Hulyo 2006 nagkanayon nga kanunay siyang gibuligan sa maayong kapalaran tungod kay wala mahitabong napakyas siya sa koleksyon nga gisangon sa iyang buhatan matag tuig. - Bong Soriano (BANAT NEWS)