Bimbo miapil na sa kontrobersiya sa Ms. Cebu

CEBU, Philippines - Nanginlabot na si Cebu City Administrator Francisco “Bimbo” Fernandez sa nakontrobersyal nga Miss Cebu 2009 partikular na sa premyo sa texters’ choice award.

Kini human gikataho sa Banat News nga lain na ang brand sa cell phone nga anaa sa Cebu City Tourism Commission (CCTC) ug dili na ang gipahibawo niini atol sa coronation night.

Gikonpirmar ni Cinbeth Orfellano, officer-in-charge sa CCTC nga Samsung Omnia ang gipahibawo nga premyo sa nahisgutang special award uban sa Globe Platinum Plan.

Apan human mabulabog ang texters choice tungod sa paghatag niini ngadto sa kandidata nga dili maoy tinuod nga midaug, nahimo na kining Nokia L-700.

Mitumaw ang kontrobersiya dihang si Kris Tiffany Janson maoy gitawag ug gihatagan sa special award ug dili si Kimberly Therese Burden nga maoy tinuod nga mananaog.

Gikataho hinoon nga giuli diha-diha ni Janson ang iyang nadawat nga premyo apan lahi ug nausab na ang brand sa cell phone sa pag-abot niini sa CCTC.

Butang nga nakakuryuso usab ni Fernandez nga mitabang na karon pagpangita ug pag-imbistigar sa tinuod nga premyo sa texters choice.

Gusto sa City administrator nga masayran kung asa na ang maong premyo ug kung miatras ba ang sponsor sa nahisgutang special award.

Kini aron abagahon ug saw-on na lang sa kagamhanan sa dakbayan ug mao nay mohatag sa maong premyo aron mahuman na ang kontrobersiya. - Elly Bolonos (BANAT NEWS)