Kemikal batok dengue gi-over praysan?

CEBU, Philippines - Gihagit ni konsehal Junard Ahong Chan ang city health officer sa dakbayan sa Lapulapu nga mopakita og kamatuoran nga wala niini overpraysi ang mga kemikal nga gipamalit sa dakbayan aron ipatay sa mga lamok sa dengue.

Kini samtang napanid-an ni Chan nga mao rag walay epekto ang maong kemikal kay imbis mawagtang, misaka man hinuon ang gidaghanon sa mga nabiktima sa maong sakit didto sa Lapulapu niadtong Enero kun itandi sa Mandaue City.

 Matud pa ni Chan nga adunay 62 ka mga kaso sa sakit nga dengue diin duha niini ang namatay sa maong buwan.

 Ang labing bag-ong nabiktimang namatay sa maong sakit mao ang usa ka bata nga taga Sitio Seabreez, barangay Buaya dakbayan sa Lapulapu.

 Atol sa ilang regular session sa milabay’ng Miyerkules ilang gipatawag si Dr. Rodolfo Berame ang City Health Officer sa dakbayan ug gipatubag kung unsay gihimo niini sa pagsumpo sa maong sakit ug kung duna pa bay mga kemikal nga batok sa lamok.

 Didto miprangka si Dr. Berame nga puwerte nang pagkahurota sa maong mga kemikal uban sa pagpanghimakak niini sa pasangil nga gi-overpraysan ang presyo sa maong mga tambal sa dangan .

 Si Chan nagkanayon nga gigahinan sa dakbayan og P3.5 milyones ang 50 ka container nga DNA Max Solution diin ang matag usa ka container niini may presyong tag P70 mil.

 Busa gihagit ni Chan si Berame sa pagpakita sa ebidensya nga wala overpraysi ang maong mga kemikal nga igpapatay sa mga lamok nga dengue. - Bong Soriano (BANAT NEWS)