Managhigugmaay Makita sa mga plaza, playground

CEBU, Philippines - Gipaabot nga hugpaan sa mga managhigugmaay ang nagkadaiyang mga plaza ug playground sa dakbayan sa Sugbu karong adlawa.

Kini subay usab sa pagduyog sa mga Sugbuanon ilabi na sa mga batan-on sa kalibutanong pagsaulog sa adlaw sa gugma, ang Valentine’s Day.

Gipasalig hinuon sa administrative officer sa Parks and Playground Commission sa City Hall, Grace Teoxom, nga luwas suruyan ang mga plaza sa siyudad.

Kini tungod kay gawas sa mga gwardiya nga nagbantay niini, dunay hugot usab nga koordinasyon ang komisyon ngadto sa kapulisan sa dakbayan.

“Naa man gyud tay security nga gi-assign nga mag-roving unya ang atong mga plaza duol ra man pud og mga police station, so, safe gyud ang manuroy,” sumala ni Teoxom.

Nag-una sa mga plaza ug playground nga ubos sa pagdumala sa Parks and Playground Commission mao ang Plaza Independencia ug Fuente Osmeña Rotunda.

Lakip na usab niini ang Plaza Sugbu, Heritage Park, Osmeña Shrine ingon man ang historical landmark nga Fort San Pedro.

Tambag lang ni Teoxom ngadto sa mga manag-uyab nga manuroy sa nahisgutang mga plaza nga dili mumugna og milagro nga dili maayong tan-awon sa publiko.

Kini aron dili usab dakpon sa mga gwardiya nga posibling musangko na hinoon sa bilanggoan ang ilang pagsaulog sa Valentine’s day.

“Magsuroy-suroy lang sila unya dili lang pud sila muanha sa mga hilit ug ngitngit nga dapit kay aron dili matintal sa kahigayunan, madakpan unya sila,” nagkanayon si Teoxom.

Sa pikas bahin, ang Cebu City Fire Department nagpadayon karon sa ilang gihimong pagsusi sa mga hotel ug mga motel sa dakbayan.

Kini aron usab sa pagsiguro nga luwas sa sunog ang mga kostomer ilabi na ang mga managhigugmaay nga muduwa og kayo niining adlawa.

Matud ni City Fire Marshall Ismael Codilla nga lakip sa ilang giinspeksyon mao ang nagkadaiyang mga kan-anan sa dakbayan. - Elly Bolonos (BANAT NEWS)