Koreano namauli sa Korea

CEBU, Philippines - Mikabat na sa 20 porsiyento nga mga Koreano nga mibisita sa Sugbu namauli na sa ilang nasud gumikan sa epekto sa global economic crisis.

Kini ang gikonpirmar ni Charlie Shin ang Vice Chairman sa United Korean Community Association Inc. dinhi sa Cebu.

 Matud pa ni Shin nga pipila na sa ilang mga kadugo gibati na og kalisod dinhi sa nasud kay mibahar pag-ayo ang balor sa ilang Koreanong kuwarta.

Miingon siya nga kaniadto amg peso nagkantidad na og .0031 won apan karon misukarap kini ngadto na sa .0021 won nalang.

Kasagaran sa mga namauli mao ang mga tinun-an nga nagtungha dinhi sa Sugbu ug ang pipila ka mga turista nga wala na magpa-extend sa ilang mga passport ngadto sa Bureau of Immigration and Deportation (BID) 7.

May mga Koreano usab nga mga negosyante nga mihunong na sa ilang negosyo dinhi sa Sugbu gumikan sa krisis sa ekonomiya nga ilang nasinati.

Hinuon malaumon si Shin nga niining tuiga kung mahapsay na ang dagan sa ekonomiya sa nasud mobalik ra gihapon ang mga Koreano nganhi sa nasud ug magpadayon sa ilang pagbubo og puhonan dinhi.

Base sa talaan sa BID 7 sa milabay’ng tuig 2007 na-una ang mga Koreano sa tanang mga langyaw nga mibisita ug nanimuyo dinhi sa Sugbu. - Bong Soriano (BANAT NEWS)