Pastor: Kidnapping tinuod

CEBU, Philippines - Giinsister sa Pastor sa International Missionary Society of Seventh Day Adventist Church Reform Movement nga si Leonardo Jastiva nga tinuod gyud nga gidagit ang iyang asawa nga si Judith niadtong Lunes sa gabii didto sa barangay Labangon.

Kagahapong adlawa, si Jastiva mao na usab ang mibisita sa buhatan sa Cebu City Police Office (CCPO) ug nakigkita sa hepe sa Intelligence Division and Management Branch, chief Sr. Insp. George Ylanan aron kurihian ang mga migawas nga report sa mga lokal nga pamantalaan nga nagsalikway sa posibleng kidnapping subay usab sa inisyal nga imbestigasyon sa kapolisan.

Gibutyag ni Jastiva sa dihang nahinabi sa Banat News misamot ang tumang kaguol nga iyang gibati human sa nahitabong pagpangdagit sa iyang asawa tungod sa migawas nga balita nga dili seryoso ang iyang pangangkon.

Giklaro ni Jastiva nga dili tinuod nga dili siya interesado nga mopasaka og kaso batok sa mga suspek human usab siya magdumili pagpirma og affidavit nga giduso sa hepe sa CCPO Sr. Supt. Patrocinio Comendador.

Gipasabot hinuon ni Jastiva nga dili pa siya makapasaka og pormal nga reklamo batok sa mga suspek tungod kay hangtod karon wala pa gyud siya’y lig-ong mga ebidensya nga magpamatuod sa tanan niyang mga alegasyon.

Nanghinaot ang Pastor nga maluwas ang iyang asawa ug gipasalig niya nga andam silang tibuok pamilya uban sa ilang upat ka anak nga molarga pahilayo sa Sugbo aron magmalinawon lang ang ilang pagpuyo.

Niadtong miaging adlaw, ang Pastor sa karibal niining relihiyon nga mao ang Seventh Day Adventist Reform Movement nga si Allan Alingalan mibisita sa CCPO aron limpyohan ang iyang ngalan nga maoy gipasanginlan ni Jastiva nga nagpaluyo sa pagdagit sa iyang asawa.

Kagahapon, miduaw usab sa Banat News si Alingalan aron klarohon nga wala siya magsulti nga polisiya sa relihiyon ni Jastiva ang pagpalarga paingon sa gawas sa nasud kun ang miyembro nag-atubang og hulga sa kinabuhi.

“Conclusion na sa polis. Nakaingon ra ko’g basin nga mao nay hinungdan kay nakaingon man to siya nako nga lumargahay siya kay naa siyay daghang hulga,” si Alingalan miingon. “Pero wa ko mag-ingon nga policy na.”

Matud niya nga maayong pasagdan ang kapolisan pagsulbad sa kaso. Apan padayon siyang mihimakak nga may kalambigitan siya sa pagkahanaw ni Judith, ang kapikas ni Jastiva. - Darrel Carumba ug Lesley Caminade (BANAT NEWS)