Pastor 'gikadenahan' wa na mobalik sa CCPO - Ylanan

CEBU, Philippines - Nahanaw na ang Pastor nga misaad nga mobalik sa buhatan sa Intelligence Division and Management Branch (IDMB) aron mohatag og pinanumpaang pamahayag kalabot sa pagkahanaw sa iyang asawa nga giingong gidagit og mga armadong tawo.

Si Sr. Insp. George Ylanan, hepe sa IDMB, nagkanayon nga wala na mobalik sa iyang buhatan ni Leonardo Jastiva, pastor sa International Missionary Society of Seventh-Day Adventist Church Reform Movement bisan sa saad niini nga mosumiter og affidavit kalabot sa pagkahanaw sa iyang asawa nga si Judith.

Matud pa ni Ylanan nga nahinabi sa Banat News nagkanayon nga si Leonardo miingon kaniya nga iya una nga ikonsulta sa iyang council ang affidavit nga iyang luwatan, apan wala na kini mobalik sa IDMB.

"Wala pa," matud ni Ylanan sa dihang gipangutana sa Banat News pinaagi sa text kun mihatag na ba si Leonardo sa gisaad niining affidavit.

Apan sa wala pa mahitabo ang panag-estorya kabahin sa affidavit gipahimangnoan na daan ang pastor nga kun mangilad siya sa iyang affidavit, mahimo siyang pasakaan og kasong perjury.

Dugang pa ni Ylanan nga katulo gyud niya gibalik-balikan ang lugar diin mahitabo ang pagdagit apan wala gyud siya'y nakit-an nga nagmatuod nga adunay nahitabong krimen sa maong lugar.

Wala usab sila'y nakit-an nga agi sa ligid diin gihisgutan nga adunay pagbabag sa sakyanan nga nahitabo, tungod kay iyang giklaro nga kun babagan og sakyanan, aduna gyu'y marka sa ligid tungod sa kakusog sa break.

Kagahapong adlawa, gipakigkitaan sa IDMB sa Cebu City Police Office   si Pastor Allan Atingalan, pastor sa Seventh Adventist Reform Program aron patubagon sa pasangil ni Leonoardo nga mao kini ang utok sa pagdagit sa iyang asawa.

Apan misamot ang pagduda sa kapolisan tungod sa mga impormasyon nga gihatag ni Atingala tungod usab kay walay klaro nga makig-estorya si Leonardo.

Si Ylanan nagkanayon nga ikonsiderar sa IDMB nga nagbuhat lang og "scenario" si Leonardo hangtod nga dili ma-verify ang pasangil niini pinaagi sa iyang affidavit.

Apan ila gihapon nga palawman ang imbestigasyon aron masuta kun unsa ang tinud-anay nga panghitabo bisan aduna sila'y pagduda nga hinimohimo ra ang kaso. – BANAT NEWS