Dr. Burden nangita sa premyo sa 'Texter's Choice'

CEBU, Philippines - Laing kontrobersiya na usab karon ang mitumaw human maimbestigahan sa Cebu City Tourism Commission (CCTC) ang texters’ choice award controversy sa Miss Cebu 2009.

Andam na unta nga modawat si Kimberly Therese Burden sa premyo sa maong special award, human masuta sa imbestigasyon nga kini maoy tinuod nga midaug sa texters’ choice.

Apan ang inahan ni Kimberly nga si Dr. Rowena Burden natingala human pahibaw-a sa Banat News nga lahi na ang premyo nga ihatag ngadto sa iyang anak.

Nasayran nga ang gipahibalo atol sa coronation night sa Miss Cebu 2009 nga Samsung Omnia ang usa sa mga premyo sa texters’ choice award.

Apan ang anaa karon sa buhatan sa CCTC mao na ang Nokia L-700 human iuli ang premyo sa unang gihatagan niini nga si Kris Tiffany Janson.

Butang nga gikahibulong ni Dr. Burden nga nangita na sa Samsung Omnia nga maoy gusto niini nga ihatag ngadto sa iyang anak.

“Samsung Omnia maoy gipahibawo nila nga premyo atol sa coronation night unya karon Nokia na ilang ihatag? Unsa gud nang kalakiha?”sumala ni Doctor Burden.

Sa nasayran, ang Samsung Omnia mokantidad og kapin sa P30 mil samtang ang Nokia L-700 giingong usa lang ka matang sa ordinaryong cellular phone.

Tungod niini, miingon si Dr. Burden nga dili niya ipadawat sa iyang anak nga si Kimberly kung Nokia maoy ihatag sa CCTC kaniya.

“Ngano gud tawong modawat mi ana, mura man na og papel nga napilo, gikan sa Samsung nahimo nang Nokia,” dugang pamahayag ni Dr. Burden.

Sa pikas bahin gipahibalo ni Dr. Burden nga dili na mausab ang desisyon sa iyang anak pag-uli sa titulo ug sa mga daug niini isip Miss Cebu 2009 2nd runner up.

Gitataw ni Dr. Burden nga irrevocable ang giluwatang resignation letter ni Kimberly ug kini mao usab ang nahukman sa ilang pamilya.

Lakip sa mga premyo nga dungan nga gitalikdan ni Kimberly sa iyang pagluwat isip Miss Cebu 2nd runner up mao ang P20 mil nga cash prize, trip to Hongkong, waterbed, ug ubay-ubay pa nga mga gift certificates.

Gipahibawo ni CCTC acting chairman Hilario Davide III nga ilang tukion atol sa ilang tigom karong adlawa ang gipadangat nga resignation ni Kimberly. – BANAT NEWS