34 ka dispatser gipanakop

CEBU, Philippines - Mokabat sa 34 ka mga dispatser sa kadalanan sa dakbayan sa Mandaue gipanikop sa task force nga gipangulohan ni Retired Chief Inspector Edwin Ermac sukad niadtong miaging adlaw hangtod kagahapon.

Si Ermac kinsa mao usab ang administrative officer sa Traffic Enforcement Agency of Mandaue (TEAM) nagkanayon nga buot lang niyang hinloan ang kadalanan sa dakbayan gikan sa mga dispatser.

Ang team nga nanikop sa maong mga dispatser gilangkoban sa mga kawani sa TEAM, mga barangay kapitan ug mga barangay tanod uban usab sa mga sakop sa Special Weapons and Tactics (SWAT) sa maong dakbayan.

Si Domingo Cortes nga maoy media liaison officer sa TEAM mibutyag sa Banat News nga ilang gisikop ang maong mga dispatser tungod sa kalapasan niini sa ordinansa No. 09-02002-098 sa dakbayan.

 Si Mayor Jonas Cortes nga maoy chairman sa traffic board sa maong dakbayan dihadiha mipasaylo sa maong mga dispatser ug mipahimangno kanila sa dili na pagsubli sa maong   kalapasan.

Gipasabot sa mayor nga dili lamang mga dispatser ang panakpon kundi bisan ang mga konduktor sa jeep nga magpunay og sing-al sa pagtawag og mga pasahero. - Romeo T. Limpangog