Tanod ug kauban, gipamusil

CEBU, Philippines - Duha ka lalaki usa niini barangay tanod ang nalandig sa tambalanan human pamusila sa duha ka wala hiilhing mga tawo didto sa barangay Lagtang, dakbayan sa Talisay niadtong Lunes sa gabii.

Ang biktima giila sa mga polis nga si Jerry Lastimosa, hingkod ug tanod sa nahisgutang barangay, ug Edwin Repolido, 23, silingan ni Lastimosa.

Si Lastimosa nakaangkon og samad pinusilan sa li-og ug si Repolido samdan usab sa walang bukton .

Ang imbestigasyon sa kapolisan sa homicide section sa Talisay City Police Station nagbutyag nga si Lastimosa diha sa iyang duty isip tanod nga nagbantay sa basketball court sa barangay aron sa pagmintenar sa kahapsay ug kalinaw sa nagduwa.

Apan matud pa kalit lang mitungha ang duha ka wala hiilhing mga tawo ug sa walay pangutana gipusil niini si Lastimosa.

Si Lastimosa nga wala maigo, misutoy og dagan aron pagsalbar sa iyang kinabuhi apan gigukod kini sa maong mga tawo ug padayong gipauwanan og mga bala hangtod nga naigo kini sa li-og.

Si Repolido kinsa diha niadtong higayona sa lugar nga nahitaboan wala makalikay sa mga saag nga bala ug maayong pagkaigo niya sa walang bukton.

Dihang nakita sa maong mga criminal nga nagtabisay na ang dugo sa mga biktima ug midugok usab ang daghang tawo, mikaratel dayon kini og panagan pahilayo sa maong dapit.

Ang mga biktima daling gihatod ngadto sa Vicente Sotto Memorial Medical Center sa dakbayan sa Sugbo aron katambalan.

Samtang ang kapolisan sa Talisay padayong mihimo og imbistigasyon sa maong hitabo. – BANAT NEWS