Mipusil ni Osorio gikiha na

CEBU, Philippines - Pormal nang gipasaka sa piskaliya ang kasong Robbery with Serious Physical Injury sa duha ka suspetsado sa pagtulis ug pagpusil kang Pauline Denise Osorio.

Si SPO2 Jeffrey Diola mibutyag sa Banat News nga nagpaabot nalang sila sa certification gikan sa Department of Social Welfare and Development (DSWD) aron masayran kung pwede bang ipadayon ang kaso nga ilang gipasaka.

Dugang pa ni Diola nga ang maong kaso ila lang gibase sa mga pamahayag sa mga saksi tungod kay 100 porsento man kining gitumbok sa mga saksi.

Samtang ang biktima matud pa ni Diola anaa lang gihapon karon sa Intensive Care Unit (ICU) apan makasulti ug tandugunon pa gihapon ang kahimtang.

Samtang sa laing bahin gipasaka usab sa piskaliya ang kasong illegal possession of firearms, concelling bladed weapon ug paghupot og ginadiling drugas, matud pa ni SPO1 Felix Gabihan imbestigador sa Criminal Investigation Bureau (CIB).

Sila si Wilfredo Sab-a, 48, taga Barrio Luz, ug Edgar Canete ,45, silingan ni Sab-a, nadakpan sa kapolisan atol sa usa ka checkpoint sa may Richmond Hotel sa dalan F. Sotto ning dakbayan sa miaging gabii.

Nasakmit gikan kang Sab-a ang .38 kalibre nga revolver nga may 5 ka buhing bala nga way lisensya ug usa ka pakiteng shabu.

Samtang si Edgar nasakmitan og kutsilyo nga adunay gitas-on nga 12 pulgadas ug ang motor nga ilang gisakyan. – BANAT NEWS