Barko vs. panagatan 6 missing

CEBU, Philippines -  Pabilin pa gihapong missing ang unom ka mga tripulante sa usa ka fishing boat nga gibanggaan sa usa ka cargo vessel sa kadagatan sa Isla sa Bantayan niadtong Domingo sa kaadlawon.

Ang mga sakop sa Philippine Coast Guard ug Bantay Dagat padayon pang nisubay sa kadagatan sa isla sa Tanguege sa lungsod sa Madredijos ug sikbit nga mga isla ug lungsod pagpangita sa missing nga crew sa F/B Linda J-Steel II.

Ang na-missing mao sila si Gerry Caquilala; William Badiabli ; Remegio Opianga ug Am Darawis pulos mga residente sa barangay Kabak sa lungsod sa Bantayan; Timoteo Jurados taga barangay Hagnaya sa lungsod sa San Remegio ug Mario Oliverio nga taga Escalante Negros Oriental. 

Samtang ang tag-iya sa maong fishing boat nga si kanhi San Remegio vice mayor Pablito “Pabling” Olayvar mipadayag dihang gihinabi sa DyDD nga andam siyang mohatag og hinabang pinansyal sa pamilya sa mga na-missing bisan sila insured lakip na ang iyang panagatan.

Si Olayvar nagkanayon kagahapon sa buntag nga hasta siya miapil na sa pagpangita sa unom ka mga tripulante kinsa gituhoang patay na.

Ang mga rescuers pakyas sa pagpangita sa unom ka mga mananagat kinsa gituhoan nga nauban kini pagtidlom sa dagat human madasmagi sa cargo vessel nga M/V Krysler nga paingon unta sa Catanduanes.

Samtang ang napulo ug tulo ka tripulante nga naluwas kauban ang duha ka mga opisyal mao sila si Roger Santillan, Pablo Santillan, Celso Santillan, Gelin Villanueva, Adrian Alob, Joel Alob, Kenneth Zabricante, Jose Cordova, Erwin Opianga, Roger Pones, Napoles Narandan ug ang boat captain nga si Gorgonio Santillan ug ang 2nd engineer nga si Tolentino Oliverio.

Matud pa sa Coast Guard station commander sa Bantayan, Clemente Codilla ang fishing boat gikan pa sa Masbate ug padulong nga modunggo sa Hagnaya sa San Remegio sa dihang nabanggaan sa M/V Krysler.

Gumikan sa kakusog sa panagbangga nalunod ang gamayng panagatan ug nanglayat ang 19 ka mga tripulante, gikatahong mi-overtake ang fishing boat sa cargo vessel hinungdan nga nabanggaan kini sa barko, napulo’g-tulo ra ka mga tripulante ang naluwas sa crew sa MV Krysler.

Samtang daling gipanalipdan ni Mayor Salvador “Sally” Dela Fuente sa Madredijos nga wala managat ang fishing boat ni Olayvar sa kadagatan sa ilang lungsod sukwahi sa migawas nga balitang kasamtangang nanaktak kini og pukot atol sa pagbangga.

Nitataw ang mayor nga sukad sa iyang paglingkod isip mayor wala na gyuy nakasulod nga mga “zipper” nga panagatan sanglit kanunay’ng magbahas-bahas sa kadagatan ang mga sakop sa Bantay Dagat, wala hinuon maklaro kun “zipper” ba ang pamaagi sa panagatan sa F/B Linda J-Steel II.

Matud pa sa mayor ang mga gagmay’ng mananagat nakapahimulos na sa ilang kadagatan sanglit daghan nang mga isda ang makuha sa ilang pagpanagat, timailhan nga wala nay nag-operate nga illegal nga panagatan sa ilang lungsod.

Dako hinuon ang pagtuo ni Dela Fuente nga nangatulog ang mga tripulante ug bugtong ang kapitan lang maoy nagmata niadtong tungora dihang mibangga sa cargo vessel ang F/B Linda nga iya ni Olayvar. - Rey Pasaporte (BANAT NEWS)