Bana gikadenahan asawa gidagit

CEBU, Philippines -  Gidagit ang usa ka ginang samtang ang iyang bana gigaid sa ilang motorsiklo pasado alas 7 kagahapon sa gabii diha sa Happy Valley street, Banawa, sa barangay Labangon ning dakbayan.

Ang banang si Leonardo Jastiva midangop sa Intelligence Detective Management Bureau sa Cebu City Police Office kagahapon sa hapon ug misumbong nga gidagit sa armadong mga tawo ang iyang asawang si Judith Jastiva,38.

Ang magtiayong Jastiva mga sakop sa usa ka protestanteng simbahan(di Romano Katoliko) ug ang lalaking si Jastiva maoy giingong national president sa maong simbahan nga may 1,500 ka sakop sa tibuok nasud, 50 niini nia sa Sugbu.

Ang magtiayong residente sa barangay San Isidro dakbayan sa Talisay gikatahong padulong na untang mouli gikan sa panimalay sa usa sa ilang miyembro sa simbahan diha sa barangay Banilad sa dakbayan sa Sugbu.

Ang magtiayon nakadesider nga sa barangay Labangon nalang sila mangagi padulong uli apan nadautan sila sa motorsiklo pag-abot sa Happy Valley hinungdan nga sila mihunong.

Matud pa sa bana nga sa wala pa sila madauti sa motor nabantayan nilang may usa ka Mitsubishi Lancer nga kolor blue nagsunod-sunod kanila gikan pa sa barangay Banilad.

 Dihang nagub-an na sila sa makina nakalitan sila sa paghunong sa maong awto diha sa ilang atubangan ug may duha ka tawong nanganaug sa maong sakyanan ug may usa sa sulod nga nagpabilin.

Nakugang nalang sila dihang kalit silang gipangtiunan og kalibre.38 rebolber ug gidiretso og gapos si Leonardo ginamit ang usa ka kadena sa iro ug gihikot diha sa iyang motorsiklo.

Samtang gibuhat kini sa usa gikatahong pugsanong gipasakay sa ilang awto ang iyang asawa ug nagdali og biya ang mga suspek dala ang iyang kapikas padulong sa F. Llamas St. sa barangay Labangon.

Matud pa niya nga may tawong mitabang kaniya ug gibuhian siya gikan sa pagkagapos, wala hinuo siya motug-an kun si kinsa ang maong tawo.

Nagduda si Leonardo nga ang kaatbang nga tinuuhan ang nibuhat niini kanila tungod kay sa wala pa mahitabo ang pagdagit aduna siyay nadawat mga panghulga pinaagi sa text message nga mibahad nga ‘hutdon’ og kuha kaniya ang iyang mga sumusunod ug ingon man iyang pamilya.

Apan sa ocular inspection nga gihimo sa hepe sa IDMB nga si Sr. Insp. George Ylanan sa dapit diin mahitabo ang giingong “pagsignit” walay bisan usa ka residente nga nakakita sa maong hitabo aron makumpirmar niini.

 “There’s something wrong,” sumala pang Ylanan kinsa nadisgrasya na diha sa mao gihapong dalan sa milabayng tuig ug daling gidugok sa mga residente ug gitabang.

Gipakigkitaan na usab ni Ylanan ang presidente sa gipasanginlang simbahan ug giingong nahibaw-an niini gikan sa maong opisyal nga dunay saad ang kadagkoan sa simbahan diin masakop si Leonardo nga si bisan kinsang miyembro nila dinhi nga may hulga sa kinabuhi awtomatikong padad-an og kwarta aron mapabalhin og puyo sa New Zealand.

Hinuon bisan paman niini imbestigahon gihapon sa IDMB ang maong reklamo, atol ning pagsulat sa balita, wala pay na-report nga nangayo og ransom o kundisyones alang sa kagawasan sa ginang. -  BANAT NEWS