Mga Turko nangahadlok

CEBU, Philippines – Mga turko nga gipasakaan og kasong pagpangawat wala mopiyansa gumikan sa kahadlok sa laing mga kasong atubangon sa Cebu City Police Office ug sa dakbayan sa Lapulapu.

Base sa impormasyon nga nasayran sa Banat News gikan sa IDMB sa MCPO nahadlok ang mga suspek nga inig gawas nila sa prisohan laing unit sa kapolisan ang mosalo kanila tungod sa uban pang mga kaso.

Kahinumduman nga sa milabay'ng semana nasikop sa IDMB sila si Zeyner Ince Surban, 55; Murat Altuntas, 28 ; Yunos Baijan 32 ug Sayar Gizem, 19; pulos mga Turkish gikan sa Istanbul, nasud sa Turkey human mosuway og pangilad.

Apan bisan paman sa ilang pagdumiling mopiyansa, ang IDMB mipahibalong may dugang upat pa ka kasong igpasakaay batok kanila niining mga semahana.

Nasuta usab nga diha sa CCPO aduna usab napulo ka kasong pagpangawat ug pangilad nga ipasaka batok kanila, samtang sa dakbayan sa Lapulapu duna say laing tulo ka kasong nagpaabot.

Midagsang ang mga reklamante batok sa upat human mogawas ang ilang dagway sa pamantalaan ug sa telebisyon nga pulos mireklamong nailad sila sa maong grupo gikan sa nagkadaiyang dapit.

Pipila lang sa mga mireklamo mao ang management sa 168 Shopping Mall diin nakuhaan kini og balor P8 mil; Mactan Grill nga nakuhaan og P23 mil; Pasalubong Center gawas sa MCIAA nakuhaan usab og P8 mil.

Matud pa ni PO3 Manolito Abellanosa sa TRS sa kapolisan sa Lapulapu nga ila nang gihikay ang mga affidavits sa mga biktima aron ila usab kini mapasaka ngadto sa korte.

Nadakpan ang upat sa gihimong hot pursuit operation sakay sa usa ka awtong walay plaka diha sa ubos nga bahin sa Subangdaku flyover atol sa ilang pag-ikyas human ilara ang usa ka money changer sa dakbayan sa Mandaue.

Ang piskalya mimando kanila pagpiyansa og P10 mil matag usa niadtong milabay'ng Biyernes apan mas gipili nilang magpatanggong nalang sa prisuhan. (Bong Soriano) (BANAT NEWS)