PNP, AFP gipasanginlan: 'Gi-torture'

CEBU, Philippines – Gidungog kagahapon sa buntag ang petition for writ of amparu batok kang Cebu Provincial Police Office director, Sr. Supt. Carmelo Valmoria sa mga militanteng pundok human sa pagdakop sa giingong leader sa NPA sa Negros Oriental nga si Ramon Patriarca.

Si RTC-7 branch 9 Judge Geraldyn Faith Econg nga maoy nidungog sa maong kaso mipadayag usab sa iyang kasuko ug kasagmuyo ngadto sa kapolisan sa lalawigan tungod kay wala siya pasudla sa CPPO niadtong adlaw nga Domingo ug gipad-an pa siya og firetruck.

Kini aron unta sundon ang kamandoan sa korte nga ibalhin sa ilang kustodiya si Patriarca gikan sa kapolisan ngadto na sa buhatan sa provincial prosecutors office ug paghatag sa notisya sa hearing kagahapong adlawa.

Atol sa hearing kagahapon si Patriarca mipasangil nga sukad sa iyang pagkasikop niadtong adlawng Huwebes sa barangay Casili lungsod sa Consolacion gitaptapan ang iyang mga mata, gihuboan ug gipasul-oban og diapers ug gi-torture.

Gipakita niini ang nahibiling bun-og sa tiyan ug sa dughan nga giingong pagdagmal kaniya sa mga awtoridad.

Kusganon hinuong gipanghimakak sa militar ug sa kapolisan ang pasangil ni Patriarca partikular ang pasangil nga kini gi-torture.

Apan sa iyang bahin, si Valmoria mipasabot nga wala nila pasudla si Econg tungod kay nakadawat sila og impormasyong may moatakeng NPA sa CPPO ug kuhaon si Patriarca.

Wala usab ipakita sa kapolisan si Patriarca sa mga abogado sa mga militante tungod kay gipaubos pa kini sa interogasyon.

Kini maoy nakapasamot sa pagtumbok ni Atty. Butch Cinco nga klaro kaayong gilapas sa kapolisan ang tawhanong katungod sa dinakpan kay giinterogar kini nga wala ang presensya sa mga abogado.

Sa pagsulat niining balita padayon pang gidungog sa ang kaso.

Si Patriarca gipasanginlang nalambigit sa pagpatay sa upat ka mga sundalo pipila na ka tuig ang milabay ug may warrant of arrest sa kasong rebellion nga giluwatan sa sala RTC Branch 25 sa dakbayan sa Danao City sa sala ni Judge Edito Enemecio.

Siya maoy gitumbok sa military nga deputy secretary sa Komiteng Rehiyonal Sentral Bisayas, finance officer ug pangulo sa taxation bureau sa NPA nga nagbase sa Negros.

Nakuha gikan kaniya ang usa ka calibre .45 pistola, duha ka Granada, cellphone, mga dokumento kabahin sa ilang kolektahunong buhis sa mga kumpanya. –BANAT NEWS