Mag-agaw giluba ug gipusposa'g botelya

CEBU – Duha ka manag-agaw ang nalandig sa tambalanan human madunggabi ug makulatahi tungod sa giingong gipareglahan atol sa gipahigayong disko kagahapon sa kadlawon sa sitio Salvador, barangay Tanke, dakbayan sa Talisay.

Ang mga biktima mao si Carlo Cabando, 20, ug ang ig-agaw niining si Joseph Cabardo, 25, kinsa pulos taga barangay San Roque sa maong dakbayan.

Base sa imbestigasyon sa kapolisan sa siyudad nasayran nga ang manag-agaw nanisko sa nahisgutang lugar.

Si Joseph kinsa giganahan na pag-ayo sa pagsayaw, misaka sa entablado ug didto mikaransa pag-ayo siya sa pagsayaw dihang usa ka wala hiilhing batan-on naglagot ug gibunalan siya og basiyong botelya ug maayong pagkapisok sa iyang walang dunggan.

Si Carlo kinsa nakakita sa maong hitabo midali pagtabang sa iyang ig-agaw apan gidunggab usab kini sa nahisgutang batan-on ug gitaupan sa kutsilyo ang iyang dughan.

Ang mga biktima gihatod dayon ngadto sa Talisay City District Hospital apan tungod sa kagrabe sa ilang kahimtang gibalhin kini ngadto sa Vicente Sotto Memorial Medical Center.

Ang kapolisan padayon pang mihimo og follow-up nga imbestigasyon ning maong insidente. – BANAT NEWS