CEBU – Intriga lang ug pagpanaot sa iyang pangalan, kini maoy giluwatang pamahayag ni Cebu City Jail Warden Supt. Efren Nemeño sa pasangil nga nagdawatan siya og suborno gikan sa pamilya sa mga insular prisoners aron di ipadayon ang pagpadala kanila ngadto sa New Bilibid Prison sa Muntinlupa.
Matud pa ni Nemeño aron di siya madudahan kabahin niini iyahang gihatag ang listahan sa mga insular prisoners ngadto sa ilang rehiyonal nga buhatan.
“Silay akong gipapili kung kinsay i-shift para mawagtang na ang issue ba nga bayran kuno ko, kapoy kaayo kay everytime nga mag-shift ko sa mga insular prisoners motumaw gyud ang intriga nga dili nako ipadala ang uban kay gibayran kuno ko,” sumala ni Nemeño.
Ang mga intriga nadawat ni Nemeño pinaagi sa text message ug duna pay ubang nanawag pa diha sa iyang buhatan.
Nasayran nga sa sunod semana, laing 26 ka insular prisoners diha sa nahisgutang bilanggoan ang gitakdang ipadala ngadto sa kauluhan.
Matud pa ni Nemeño nga ang maong mga binilanggo kabahin sa nahabiling 190 ka insular prisoners niadtong miaging tuig diha sa City Jail.
Nasayran nga moabot sa 212 ka mga insular prisoners diha sa nahisgutang bilanggoan ang napadala sa Muntinlupa sulod sa unom ka higayon niadtong miaging tuig.
Ang insular prisoners mao kadtong piniriso nga gikombikto sa giatubang nga kaso sa korte ug gisentensyahan og labing minos unom ka tuig nga pagkabilanggo. – BANAT NEWS