Habal-habal driver gitabanga'g luba

CEBU – Namatay diha-diha gilayon ang usa ka habal-habal driver human gitabangan og dunggab sa iyang duha ka pasahero kagahapon sa alas 3:00 sa kaadlawon sa barangay Poblacion lungsod sa Barili.

Ang namatay giila sa kapulisan nga si Mario Torres 47, taga sitio Salay barangay Mayana sa nahisgutang lungsod human maputos sa dinunggaban ang nagkadaiyang parte sa lawas.

Si SPO2 Saldy Orillo sa Barili Police Station nga gikahinabi sa Banat News nagkanayon nga duha ka mga wala mailhing suspetsado maoy nitabang og dunggab sa biktima nga nagpahatod sa nahisgutang dapit.

Matud pa ni SPO2 Orillo nga gikan ang biktima sa barangay Buloc-Buloc diin dunay gipahigayong disko ug gisakyan sa duha ka wala mailhing pasahero ang nagpahatud sa barangay Poblacion.

Pag-abot sa merkado publiko sa nahisgutang barangay ang drayber nga si Torres ug ang iyang pasahero nagkalalis sa wala matinong rason.

Nahunong ang motorsiklo ug mao nalay nakit-an sa ubang habal-habal driver nga gitabangan pagdunggab ang biktima sa duha ug gibiyaan.

Ang biktima gitabang unta apan nakabsan gilayon kini sa iyang kinabuhi gumikan sa kadaghang samad nga naangkon sa lawas.

Dugang nasayran sa kapolisan nga walay kontra ang biktima diha sa lugar gisalikway ang anggulong tulis isip motibo gumikan kay diha paman ang salapi sa biktima.

Gituohan sa kapulisan nga bangag sa ilimnong makahubog ang mga suspetsado nga gituuhang taga diha ra sa maong lugar apan wala lang maklaro sa mga saksi ang panagway. – BANAT NEWS