15-anyos gipatay

CEBU – Patay diha-diha ang usa ka menor de edad human kini pusila sa wala mailhing tawong nagsul-ob og bonnet mga alas 11:45 niadtong Sabado sa gabii didto sa national highway barangay Baliwagan lungsod sa Balamban.

Ang biktima giila sa kapulisan nga si Junpe Legaspino 15, taga sitio Buswang barangay Nangka sa nahisgutang lungsod human makaangkon og tulo ka mga samad pinusilan sa lawas gikan sa wala matinong kalibre sa armas.

Samtang ang nag-inusarang suspetsado gihulagway lang nga kasarangan ang panglawas nga nag-bonnet.

Si PO2 Derwin Suico sa Balamban Police Station nga gikahinabi sa Banat News nagkanayon nga ang biktima nagsakay og traysikad paingon na untang mopauli.

Dihang sa kalit lang ang akusadong nag-sul-ob og bonnet hilom nga naglakaw nga nagsunod sa traysikad ug dayong midul-it pagpusil tulo ka higayon sa biktima hinungdan sa hinanali niining kamatayon.

Human sa pagpamusil dali kaayong nahanaw ang suspetsado sa nahisgutang lugar.

Matud pa ni PO2 Suico nga sa pagkakaron wala pa nila ma-establisar ang motibo apan wala nila gisalikway ang anggulo usab sa mga nagkabanging grupo diha sa ilang dapit.

Sumala pa niini nga nagproblema gyud sila karon diha sa ilang lugar gumikan sa maong mga gang nga nisulbong sa ilang lugar. – BANAT NEWS