Talisay may clean and green contest

CEBU – Ang kagamhanan sa siyudad sa Talisay ug ang Saint Scholastica’s Academy naghiusa sa pagpahigayon og Environmental Conservation Research Organization (ECRO) Clean and Green Contest ngadto sa tanang pribado ug publikong tunghaan sa high school sa dakbayan sa Talisay.

Ang maong proyekto gilusad na niadtong Nobiyembre 21, 2008 sa Saint Scholastica’s Academy nga nahimutang sa barangay Tabunok.

Gumikan sa dakong kaayohan nga idulot ning maong programa alang sa tibuok syudad, nakiglambigit dayon ang mga opisyal sa maong dakbayan sa tagdumala sa eskuylahan aron tambayayongan pagpadagan ang maong aktibidad.

Sila si Mayor Socrates Fernandez, Konsehal Bernard Joseph Odilao kinsa tsirman sa komitiba sa kalikupan, mga opisyal sa Department of Interior and Local Government (DILG), representante sa Department of Health (DOH), mga opisyal sa Tabunok ug mga representante sa nagkalain-laing tunghaan sa siyudad mitambong sa paglusad sa maong kalihukan.

Ang maong contest nga gisugdan niadtong Nobiyembre 21, 2008 magpadayon hangtud sa Pebrero 2009 ug ang awarding niini unya na ipahigayon sa Marso 29, 2009.

Ang tulo ka mapiling modaog sa maong contest makadawat og P3,000, P2,000 ug P1,000 sa 1st, 2nd ug 3rd prize.

Tumong sa kagamhanan sa siyudad sa pagpahigayon sa maong contest nga aron mahimong Cleanest and Greenest o pinakalimpiyong siyudad sa tibuok probinsiya sa Sugbo ang Talisay.

Gawas sa mga tunghaan, ang siyudad mopahigayon usab og susamang contest ngadto sa mga establisamento ug kabarangayan. (Brenda D. Batuto) (BANAT NEWS)