Mga nurse nagdasok sa Kapitolyo
CEBU – Nagsugwak ang mga lisensiyadong nurse sa Kapitolyo nga nangaplay og trabaho alang sa nasud sa Singapore niadtong Biyernes.
Si Julius Chua, usa ka piniyalan sa Provincial Employment Services Office (PESO), nagkanayon nga 300 ka mga nurse ang gikinahanglan sa labing daling panahon sa nasud sa Singapore.
Matud pa ni Chua nga ang nasinating global crisis karon maoy nakapasamot sa pagdasok sa mga aplikante sa nagkalainlaing trabaho sa gawas sa nasud ilabi na mga nurse.
Ang nanginterview sa mga aplikanteng nurse mao ang SSL Manpower Services nga nagbase sa Singapore.
Si Chua miingon nga mao pa kini ang unang higayon nga nga may kompaniyang nang –hire og labing daghang nurse dinhi sa Sugbo niining tuiga , nga maoy hinungdan sa pagsugwak sa mga aplikanteng nangaplay.
Gawas sa 300 ka mga nurse nga gikinahanglan sa SSL Manpower Services, ang Perido Agency nanawat usab og mga aplikante nga skilled workers alang sa Middle East.
Gipahibawo usab niini nga karong Pebrero 10, adunay usa ka US company ang manawat og mga trabahante sa hotel, samtang sa Pebrero 11 laing kompanya ang mang-hire og mga enhinyero alang sa Qatar.
Si Chua niawhag sa tanang interesadong aplikante sa pagduaw sa ilang buhatan sa PESO alang sa dugang mga inpormasyon. –BANAT NEWS
- Latest
- Trending
