CEBU – Naalarma ang mga molupyo sa barangay Camputhaw ning dakbayan sa Sugbu tungod sa pagpangamatay sa ilang mga binuhing manok.
Ang mga molupyo sa nahisgutang barangay nagtuo nga gipang-atay ang ilang mga manok tungod kay kini giingong kalit lang manglagom ug may mogawas nga tubig sa ilong.
Usa sa nabalaka niini mao ang professor sa University of the Visayas (UV) nga si Dr. Russel Fullozos nga tigbalita usab sa DYHP-RMN Cebu.
Matud ni Fullozos nga hasta ang pipila ka binuhi niyang mga manok wala makalikay sa atay ug ang tanan nangamatay.
Nagkanayon si Fullozos nga lakip sa nangamatay mao ang mga manok hiniktan sa iyang mga silingan diha sa upper ug lower Camputhaw.
Nabalaka si Fullozos nga kung kini dili matabang motakboy unya ang sakit sa ubang mga manok diha sa ilang barangay ug sa kasikbit nga mga dapit.
Giingong nagsugod ang pagpangamatay sa mga manok diha sa barangay Camputhaw niadtong adlaw nga Huwebes ug nagpadayon hangtud kagahapon.
Dali hinuong gipadalhan og mga sakop ni City Veterinarian Doctor Alice Utlang ang nahisgutang barangay human masayod sa maong hitabo.
Nagduda ang City veterinarian nga Newcastle Disease (ND) kon tukdaw o atay gyud ang nitakod nga sakit sa mga manok diha sa Camputhaw.
Nagtuo si Doctor Utlang nga wala mabakunahi og ND vaccine ang mga manok diha sa nahisgutang barangay hinungdan nga nataptan sa nahisgutang sakit.
“Wa dagway pabakunahi og ND vaccine sa mga tag-iya ang ilang mga manok maong nangamatay, naa man unta tay bakuna ana,” sumala ni Utlang.
“Viral nang maong sakit nga makuha sa tubig, hangin ug sa hugaw, malabyan imong manok anang sakita mamatay gyud kun dili mabakunahan,” dugang ni Utlang.
Hinuon gimanduan na ni Utlang ang iyang mga sakop nga susihon ang mga manok diha sa Camputhaw ug bakunahan sa gikinahanglang vaccine. (Elly Bolonos) (BANAT NEWS)