Suspek sa Iranian -slay 'dakpan

CEBU – Duha ka mga kasong pagpanulis lakip na ang pagtulis-patay sa Iranian ang dakong posibilidad nga masulbad tungod sa menor de edad nga mihatag og impormasyon sa kapolisan.

Gawas sa biktimang Iranian nga si Ashkan Aminian nasubay usab sa kapolisan ang suspek sa pagtulis ug pagpusil sa 20-anyos nga estudyante sa Bigfoot Mactan nga si Pauline Denise Osorio.

Sa interview sa DySS ang drayber sa motorsiklong gigamit pagtulis-patay kang Aminian nga si Kenneth Gabutan, 18, taga barangay Kalunasan miangkong siya ug ang usa ka 17-anyos nga kaubang ‘tulisan’ maoy responsable sa kamatayon sa langyaw kinsa sumala pa sa report kagabii mitahan na gikan sa Leyte.

Matud pa niya wala siya bun-uga ug kulataha aron moangkon sa maong krimen ug miangkong wala sa ilang plano ang pagpatay kundili aron lang gyud “makapangigo(tulis).”

Si Aminian napalgang patay nga may samad pinusilan sa nawong diha sa dalan Juana Osmeña Extension barangay Capitol Site apan nalibog ang kapolisan sa motibo tungod kay walay nakuha gikan sa biktima maong una nilang gidudahan nga posibleng ‘love triangle’ ang motibo.

Apan sa pamahayag ni Gabutan, kini mibutyag nga ang 17-anyos nga suspek miadto sa iyang balay ug mihagad kaniya nga manulis, gamit ang motorsiklong may plakang GK-2930 nga gipanag-iya ni Malbert Rama nga ilang silingan milakaw silang duha.

Matud pa niya ilang naagian si Aminian sa dapit ug ilang gibalikan, ang Iranian gikatahong misuksok dayon sa iyang cellphone apan ang iyang kauban mimando sa pag-ingon “wallet.”

Silang duha daling mikanaog ug si Gabutan subling mimando sa biktima pag-ingon “give me your wallet” apan nakugang nalang siya dihang kalit siyang gidabu-dabuhan og kinumo sa biktima.

Dihang nakaatras si Gabutan kalit gipusil sa iyang kauban sa nawong ang Iranian, nahadlok silang kuhaon ang cellphone sa biktima tungod kay mabinlan kini og fingerprints.

Sa report sa Homicide Section, narekober na ang kalibre .22 ug ang motor nga gigamit sa krimen.

Samtang ang mao gihapong 16-anyos maoy nakahatag og impormasyon nga miresulta sa pagkasikop sa tulisang mipusil kang Pauline Denise Osorio.

Nadakpan sa grupo ni Sr. Insp. Michael Anthony Bastes ang duha ka tulisan nga nangangkong pulos mga menor de edad nga pulos gihapon taga barangay Kalunasan.

Matud pa ni SPO1 Jeffrey Diola, investigator sa TRS positibong giila sa usa ka testigo diha sa crime scene ang drayber samtang ang mismong gunman giila usab sa uyab sa biktima.

Apan ang duha kusganong mihimakak sa mga pasangil bisan paman sa pag-ila kanila sa mga testigos, ang gitumbok nga 17-anyos nga gunman gi-paraffin test na kagahapon.

Si Cebu City Police director Patrocinio Commendador midumili sa pagkomentaryo kun nasulbad na ang maong mga kaso ilabi na ang sa Iranian apan dako ang pagtuong lig-on ang kasong ilang mapasaka. (Lesley Caminade) (BANAT NEWS)