Gikiha og 69-counts nga kawat

CEBU – Gipasakaan og 69 ka kasong pagpangawat ang usa ka kawani sa usa ka appliance center dinhi sa Sugbu tungod sa pagkahanaw sa kapin sa P2 milyones nga salapi.

Si Cebu City Prosecutor Nicolas Sellon niaproba sa 69 ka kasong pagpangawat batok sa usa ka Mario Cueco molupyo dinhi sa dakbayan sa Sugbu.

Nasayran nga si Cueco nga nagtrabaho sa usa ka appliance center dinhi sa dakbayan sa Sugbu sulod sa 12 na ka tuig, giakusahan sa iyang labaw nga nimao-mao sa pagpabaylo og tseke sulod sa 69 ka higayon.

Sigon sa sumbong, ang kinatibuk-an kantidad nga napabayloan nga tseke niabot na og kapin sa 2 milyones ka pesos apan ang kwarta wala mapunta sa kumpanya hinungdan nga gipasakaan kini sa tag-iya sa appliance center.

Si Sellon nagkanayon sa iyang resolusyon nga napakyas si Cueco sa pagpakita og mga papeles nga nahatagan siya og authorization sa management sa pagpabaylo og tseke.

Tungod sa kadako sa nadispalkong kwarta, mokabat usab sa dul-an sa 2 milyones ka pesos ang girekomendar nga piyansa alang sa temporaryong kagawasan sa akusado. (Chester Abadilla) (BANAT NEWS)