Cerge, Ace, Gwen Sa Lakas Longlist

Cebu - Tulo ka mga Sugbuanong politiko ang nasulod sa ‘long list’ sa Lakas Muslim-Christian Democrats (Lakas-CMD) alang sa umaabot nga 2010 elections.

Si Presidential Adviser on Political Affairs Gabriel Claudio nagkanayon nga dunay 33 ka mga kandidatong napanganlan atol sa executive meeting sa partido nga gipanguluhan ni Presidente Gloria Macapagal Arroyo ug ni Lakas chair emeritus ug kanhi pangulong Fidel Valdez Ramos sa Holiday Inn Hotel sa Pampanga.

Ang mga Sugbuanong politiko nga naapil sa listahan mao ang kasamtangang Press Secretary Cerge Remonde; Gobernador Gwendolyn Garcia ug Tourism Secretary Ace Durano.

Si Remonde sa pakighinabi sa Banat News sa telepono kagahapon mihangop sa pagkunsiderar kaniyang usa sa mga contenders sa administrasyon sa 2010 apan mipasabot nga sa pagkakaron wala pa sa iyang huna-huna ang maong eleksyon.

“I am surprised that the administration party considered me as one of the possible candidates, but I have no specific plans on this matter for now I have to concentrate on my job right now. But I am honored that they considered me as one,” sumala pang Remonde.

Samtang mao gihapon ang iyang tubag kabahin sa mitumaw nga report nga mokandidato siya sa Cebu City South District.

Sa laing bahin, si Gob. Garcia daan nga mipahibalong wala siya’y planong modagan sa bisan unsang national position tungod sa kadaghan sa iyang buot nga mahuman dinhi sa Sugbu.

Dihang gikuhaan og reaksyon sa maong report, si Garcia nagkanayon nga di pa panahon aron siya motubag sa mga ‘political questions.’

“I’m not open to political question right now. Ask me in 2010,” sumala pa sa gobernadora.

Samtang ang ubang gipanganlan sa listahan mao sila si re-electionists Juan Ponce-Enrile; Richard Gordon; Lito Lapid; Ramon Revilla Jr. ug Miriam Defensor Santiago; Sonny Alvarez; Mikey Arroyo; Lito Atienza; Silvestre Bello III; Esperanza Cabral; Mike Defensor; Francisco Duque; Eduardo Ermita; Marides Fernando; Raul Gonzalez; Ephraim Genuino; Jesli Lapus; BID commissioner Marcelino Libanan.

Dugang pa niini mao sila si Edu Manzano kinsa maoy chairman karon sa Optical Media Board; Tessie Oreta; Butch Pichay; Monico Puentevella; Ralph Recto; Martin Romualdez; Chavit Singson; Tito Sotto; Buboy Syjuco; Gilbert Teodoro; Ray Villafuerte ug Ed Zialcita.

“These are the probable contenders for the party’s senatorial slate for the 2010 election,” sumala pang Claudio.

Ang mga kandidato ipailawom sa screening ug konsultasyon sa mosunod nga mga adlaw aron mapilian ang labing paborableng kandidato nga gikinahanglan sa Lakas-CMD, usa sa gipangita mao ang credentials ug kwalipikasyon aron mapilian. - Uban sa report ni Gary Lao (BANAT NEWS)