Ms. Cebu 2009 2nd runner up mitingog na's isyu

Cebu - Mitingog na ang kontrobersyal nga Miss Cebu 2009 2nd runner-up nga si Kimberly Therese Burden human sa kontrobersyal nga resulta sa texters’ choice award sa nahisgutang beauty pageant pipila ka semana lang ang nakalabay.

Nahimong kontrobersyal ang texters’ choice award dihang lain ang gihatagan niini ug dili ang tinuoray nga nidaug nga si Burden.

Gipadayag sa batan-ong Burden nga wala pa siya hingpit maka-recover gikan sa kauwaw nga iyang gibati human sa kontrobersiya.

“Wala pa gyud kay first pageant gud ni nako unya sheltered pa gyud kaayo ko nga pagkatawo dili man gani ko tiglaag unya mao ni gihatag nila nako,” sumala ni Burden.

Sa susamang kalambuan karong adlawa ipagawas ang resulta sa komitiba nga gipanguluhan ni Konsehal Gerardo Carillo nga niimbestigar sa maong kontrobersiya.

Matud ni Burden miangkon og respeto kang acting vice mayor Hilario Davide III nga maoy nitukod sa komitiba apan nagpabilin gihapon ang iyang pagduda.

“Dako gyud ang chance nga dili in-favor namo ang resulta tungod sa remarks ni acting mayor Michael Rama nga mura’g nipabor sa mga organizers,” matud pa ni Burden.

Giklaro hinuon ni Davide nga walay kalambigitan ug wala manginlabot si Rama sa gipahigayong imbestigasyon sa komitiba ni Carillo, apan gisaway sa inahan sa 2nd Runner-up si Rama tungod sa pamahayag niini.

Sa pagsuwat ning balita kagabii nagtigom pa ang mga sakop sa Cebu City Tourism Council (CCTC) nga maoy tigpasiugda sa maong beauty pageant. – BANAT NEWS