MV Doulos midonar og libro

Cebu - Ang MV Doulos, ang labing daku nga floating library sa tibuok kalibotan, mihatag og nagkalain-laing libro nga mobalor og P7,000 ngadto sa Alaska Elementary School sa barangay Mambaling.

Ang mga crew sa maong barko pinangulohan sa ilang kapitan nga si Capt. Pat Tracy maoy nangunay og apod-apod niini ug pormal sab nga gidawat sa principal sa Alaska Elementary School nga si Carmen Chan.

Si Lissi Ottaches, usa ka Austrian volunteer nagkanayon nga nakig-alayon sila sa GMA-Channel 7 aron matultolan ang tunghaang naapil og kasunog niadtong Sabado sa hapon.

Matud pa ni Ottaches nga ang ilang donasyon naandan na sa MV Doulos tungod kay usa man sab sila ka charitable institution nga namaligya og mga libro sa ubos kaayong presyo.

Ang librong gipanghatag naglakip sa Collin dictionary, Explore the Blue, Human Body, Charlotte's Web ug Family World Atlas ug uban sa pipila ka mga dagkong reference books.

Samtang malipayon kaayo ang mga kabataan sa Alaska Elementary School nga niingon og "Thank You MV Doulos!" si Chan nagkanayon nga malipayon kaayo siya nga nakadawat sa maong donasyon kay daku kaayo kini'g tabang sa mga tinun-an lakip pa gani ang anaa pa sa kindergarten.

"Nalipay ko'g daku nga may nagpakabana sa among kahimtang dire," matud pa ni Chan dihang gikahinabi siya sa Banat News atol sa turn-over ceremony. Ang pipila sa misaksi mao ang mga faculty members nga sila si Chona Sierra, ang Grade 6 level coordinator, Faridah Nelida-Navarro ug Marlon Abella.

Ang Doulos, usa ka pinulongang Greyego, nagpasabot nga "servant." Ang maong barko adunay 50 ka mga volunteers gikan sa nagkalain-laing nasud nga wala magdawatan og sweldo.

Aduna sila'y labing menos lima ka Filipino crew.

Ang MV Doulos anaa karon sa Pier 2 ug magpabilin hangtod sa Pebrero 10 ug dayon molarga padulong sa Bacolod City ug magpabilin sulod sa duha ka semana una pa molahos sa Manila alang usab gihapon sa upat ka semanang pagpamaligya.

Unya sa Abril, molarga ang MV Doulos ngadto sa Taiwan. - Gabby Malagar (BANAT NEWS)