4 ka Turko 'nangilad' sikop

Cebu - Upat ka Turkish ang gipasanginlang nangilad sa mga dagkong establisamento sa dakbayan sa Sugbu, Consolacion ug dakbayan sa Lapulapu gidakop sa miaging hapon.

Ang mga nadakpan mao sila si Murat Alfuntas, 28, Yanus Baigan, 32, Sayar Gizen Sarucan, 55, pulos lumad nga taga Istanbul, Turkey samtang misuway og biktima kang Julius Cabatingan, 23,teller sa 9271 Money Changer sa dakbayan sa Mandaue.

Si SPO1 Rico Cabatingan sa Investigation Division and Management Bureau (IDMB) sa Mandaue City Police Office (MCPO) miingon nga ang pagdakop natigayon dihang nagpailis ang tulo sa ilang $100.

Kini dihang gihulman sa maong mga suspek ang binandol nga P1,000 bills sa katarungan nga ilang pilion pinaagi sa serial number kay ilaha kining himuong handumanan.

Apan dihang gibalik sa tulo ang binandol nga salapi kuwang na kini og P2,000 hinungdan nga mitawag si Cabatingan sa iyang maguwang nga si SPO1 Cabatingan.

Daling gialarma ang mga police station sa dakbayan hinungdan sa pagkasikop sa tulo sakay sa usa ka Toyota Vios nga walay plaka samtang padulong sa Cebu City dihang nababagan sa mga sakop sa Presinto 2 sa Subangdaku.

Si SPO1 Cabatingan miingon nga sa ilang pakisusi nga gihimo maoy ilang nahibaw-an nga daghan na og mga gibiktima ang mga suspetsado sa susamang modus operandi.

Kagahapon nagpunsisok ang mga reklamante sa nagkalain-laing mga establisamento sa Metro Cebu ug positibong mitumbok sa upat nga maoy miilad kanila ug misakiyo sa ilang mga salapi, ang mga suspek mihimakak hinuon sa mga pasangil. - BANAT NEWS