Mini-bus vs. motor 1 patay, 1angol

CEBU - Usa ang patay ug usa ang anaa sa talandugong kahimtang human mobangga ang motorsiklo niining gisakyan ug nalatayan ang mga biktima sa gikasugat nga minibus sa barangay luyang lungsod sa Carmen niadtong Lunes sa alas 4:10 sa hapon.

Dead on arrival sa Danao City District Hospital ang drayber sa motorsiklong si Rodolfo Vargas, lumad nga taga Bacolod Negros Occidental.

Samtang ang angkas niining si Danilo Arnilla, taga barangay Paknaan dakbayan sa Mandaue talandugon ang kahimtang sa usa sa mga tambalanan sa dakbayan sa Sugbu.

Ang drayber sa minibus mao si Rodito Bañes, 36, taga Paypay lungsod sa Daanbantayan.

Matod ni SPO2 Simplicio Ibo sa Carmen Police dihang nahinabi sa Banat News ang motorsiklo nga gisakyan sa mga biktima gikan sa habagatang bahin ug paingon kini sa norte nga direksiyon nga gihulagway nga kusog ang pagpadagan.

Pag-abot sa kurbadahon nga dalan sa nahisgutang lugar nikawat sa pikas linya ang maong motorsiklo ug wala na makabawi hinungdan nga misampak kini sa minibus.

Human matumba nalatayan ang motorsiklo ug ang drayber sa ligid hinungdan sa kamatayon niini.

Si Bañes kasamtangan karong nagtingkagol sa detention cell sa kapulisan samtang giandam ang kasong ipasaka batok kaniya. (Darrel Carumba)   (BANAT NEWS)