Tanod nakuryentihan patay

CEBU - Nakuryentihan-patay ang usa ka tanod nga susamang higayon caretaker sa Mantayupan Falls sa barangay Campangga lungsod sa Barili niadtong Domingo sa alas 3:30 sa hapon.

Namatay diha-diha si Eugeniano Biadog, 56, tanod sa nahisgutang lugar ug maoy caretaker sa nahisgutang falls.

Matud pa ni PO3 Job Sarvida sa Barili Police dihang nahinabi sa Banat News ang tanod gikatahong nagsakay kini sa dakit ug nagpalutaw-lutaw sa maong falls nga migamit og puthaw nga tukod aron mosibog ang dakit.

Apan samtang nagtukod sa maong puthaw nga mao say iyang gamitong pangkuhit sa mga naglutaw’ng hugaw, aksidenteng nasaghid ang puthaw sa linya sa kuryente daplin sa falls nga dunay paksit nga nakuryentihan.

Nakit-an pa sa kauban sa biktima nga nagkirig-kirig kini ug gisuwayan unta pagtabang apan wala sila makapadayon dihang ilang nabatyagang grounded sad ang tubig sa falls sa ilang pagtunob.

Usa sa mga kauban ni Biadog daling midagan sa switch ug gipalong kini una pa sila nakaduol sa nahimutangan sa biktima apan patay na kini ug wala na madala pa sa tambalanan.

Ang kapulisan nihulagway nga aksidente gyud ang nahitabo ug walay mabasol sa kamatayon niini.   (BANAT NEWS)