Mga unibersidad nabalaka sa krisis

CEBU - Upat ka mga dagkong unibersidad sa dakbayan sa Sugbu nagtigum gumikan sa nasinating krisis sa nasud nga gipanglantawang makapamenus unya sa gidaghanon sa mga tinun-an sa ilang mga unibersidad.

Atol sa gihimong 888 News Forum diha sa Waterfront Hotel and Casino kagahapon sa buntag nag-abot ang mga presidente sa upat ka mga dagkong pribadong tunghaan dinhi sa Sugbu ug ingon man ang representante sa Department of Education ug Commission on Higher Education (CHED).

Ang upat ka mga dagko ug pribadong tunghaan nga gi-representahan sa ilang presidente nga sila si Alecia Cabatingan sa University of the Southern Philippines Foundation (USPF); Agosto Go sa University of Cebu (UC), Andrew Aznar sa Southwestern University (SWU) ug ang bag-ong natudlo nga presidente sa University of San Carlos nga si Fr. Dionesio Miranda.

Si Go, nipadayag nga labihang ngil-ara sa nasinating krisis sa ekonomiya karun sa nasud hinungdan nga nahukman sa ilang board of directors nga walay increase sa tuition fees ug kunhuran pa kini og P2 per unit.

Gitataw ni Go nga sila pa ug ang University of the Visayas ang nihimo niini, ang pamilyang Gullas sa UV sa sayo pa ni-anunsyo og 10 percent tuition fee decrease sa kolehiyo sugod karong summer class ug sa 2009-2010 gawas lang niadtong mga medical courses.

 Gitambagan usab ni Go ang mga ginikanan nga gustong mopatungha sa ilang mga anak sa pagkuha og kursong Marine ug Nautical tungod kay menos kaayo kung itandi sa kursong nursing ang tuition niini apan in-demand kini sa pagkakaron, kumparar sa nursing.

Samtang ang presidente sa USPF ug SWU nagkanayon nga wala pa sila makabatyag nga nimenus ang mitungha karong tuiga apan mipadayag usab sa ilang mga kabalaka nga duna unyay mangundang og eskuyla karung 2009-2010 school year tungod sa krisis.

Si Fr. Miranda sa iyang bahin niingon nga bisan og wala pa makasinati og financial crisis ang nasud daan nang migamay ang gidaghanon sa ilang mga tinun-an.

Matud ni Fr. Miranda nga sa pagkakaron wala pa silay desisyon kung dunay decrease o ba kaha discount sa tuition fee nga ilang ipatuman sanglit duna pay meeting nga himuon ang ilang board bahin niini.

Si Constantina Barba sa CHED-7 nibutyag nga igo lang sila mo-assist sa mga tunghaan ug tinun-an kung unsay makab-ot nga desisyon. (Rey Pasaporte) (BANAT NEWS)