Text message kang Osorio gisusi
CEBU - Nanghinaut ang kapolisan sa dakbayan sa Sugbu nga pinaagi sa nakuhang impormasyon sa cellphone sa gipatay nga si Piskal Patrick Ian Osorio makatabang sa ilang imbestigasyon.
Si Sr. Supt. Patrocinio Comendador, kinsa mao usab ang Task Force Osorio commander sa maong kaso nagkanayon nga nabuksan na sa Criminal Investigation and Detection Group (CIDG) sa Camp Crame ang duha ka sim cards sa cellphone ni Osorio.
Pinaagi niini masubay nila ang mga nangaging mga text messages nga nadawat ni Osorio nga posibleng maghatag og giya sa kapolisan ngadto sa mga mamumuno.
Miangkon si Comendador nga sa pagkakaron wala pa gihapoy kasong mapasaka sanglit wala pa sila’y suspek gawas lang sa mga circumstantial evidence ug testimonya sa mga nakasaksi.
Subay niini, ilaha usab susihon ang .45 kalibreng armas sa nadakpang giingong gun-for hire sa CIDG-7 sa lungsod sa San Fernando nga si Christopher Luna.
Kini aron i-cross match sa mga basiyo sa mga bala nga nakuha sa mga high profile murders sa dakbayan nga hangtud karon wala pa gihapon masulbad.
Kini mao ang mga kaso sa pagpatay kang Atty. Richard Sison, Piskal Patrick Osorio ug uban pang mga dagkong kaso. (Guam Logroño) (BANAT NEWS)
- Latest
- Trending
