Babayeng puya gibilin sa multicab

CEBU - Usa ka bag-ong natawo nga batang babaye napalgang patay niadtong Lunes sa gabii diha sa likod sa multicab nga giparada sa sitio Palm Lodge, barangay Tabunok, dakbayan sa Talisay.

Si PO2 Lino Diez sa homicide section sa Talisay City Police Station kinsa maoy mi imbestigar sa maong hitabo sa pakighinabi niini sa Banat News mibutyag nga sila si Lowell Medes ug Merlyn Gerasmio parehong residente sa barangay Lagtang sa maong siyudad mianha sa lugar sakay sa multicab tungod kay mibisita sila sa ilang higala.

Apan sa ilang pagbalik sa giparadahan sa multicab nasigpatan ni Medes ang lampin diha sa likod sa sakyanan ug dihang ilaha kining gisusi   giputos diay niini ang usa ka puyang babaye nga mao pay pagkatawo.

Base sa imbestigasyon ni PO2 Diez usa ka residente sa lugar nga si Catherine Ceballos ang nakakita og usa ka babayeng nagsul-ob og puti nga blouse ug pedal pants diha duol sa maong multicab.

Ang maong babaye nagdala og shoulder bag nga color brown nga dunay gikugos nga susama og batang giputos og lampin.

Matud ni Diez nga nabantayan ni Ceballos nga kadudahan ang lihok sa maong babaye tungod kay nagpaso-paso kini diha sa lugar nga sama’g naniid.

Pila ka oras ang milabay sa pagkawala sa maong babaye napalgan ang nahisgutang bata.

Ang maong bata ang gidala ni PO2 Diez ngadto sa Talisay City District Hospital apan sa paghiling ni Dr.Jasmine Olorvida patay na kini.

Gibana-bana ni Olorvida nga ang maong bata ang nagpangidaron gikan sa duha ngadto sa tulo ka adlaw pa lang gikan sa pagkahimugso niini.

Ang patay’ng lawas sa bata ang gidala ni PO2 Diez ngadto sa Saint Francis Funeral Homes sa barangay Bulacao, Talisay aron kini ma-autopsy.

Ang kapolisan ang mipahigayon og follow-up nga imbestigasyon sa maong insidente aron mailhan ang inahan sa maong bata.