Mike saludo sa MCPO

CEBU - Saludo si Cebu City Acting Mayor Michael Rama sa kapulisan sa dakbayan sa Mandaue tungod sa daling pagkasulbad sa duha ka dagkong krimen sa siyudad.

Kini mao ang pagpatay sa call center agent nga si Lynn Vi Ebarita ug ang kawani sa MEPZ nga nakit-ang patay diha sa Mandaue Reclamation area.

Nasikop sa kapulisan sa siyudad sa Mandaue ang giingong utok ug responsabli sa maong mga krimen sulod lang sa pipila ka mga adlaw.

Gidayeg ni Rama ang kakugi nga gipakita sa kapulisan sa maong dakbayan uban sa paghagit sa kapulisan sa siyudad sa Sugbu nga kini sundon.

Kini tungod kay hangtud karon, wala pa masulbad ang kaso ni assistant City prosecutor Patrick Ian Osorio nga gibanhigan-patay niadtong miaging buwan.

Lakip na niini ang pagpusil-patay usab sa usa ka Iranian national nga si Ashkan Aminian nga usa ka tinun-an sa University of the Visayas (UV).

Matud ni Rama nga usa ka hagit sa kapulisan sa dakbayan ang kasulbaran sa nahisgutang mga kaso diha sa Mandaue.

Una nang gipasalig sa acting mayor ngadto sa ambassador sa Iran nga si Ali Mojtaba Rouzbehani paghatag og kasulbaran sa kamatayon ni Aminian.

Kini atol usab sa pagduaw ni Rouzbehani sa buhatan ni Rama niadtong miaging buwan human sa kamatayon sa Iranian national. Natagbaw pa hinuon ang acting mayor sa performance sa kapulisan sa dakbayan apan kini giingong iya nang gipahimangnoan.  (Elly Bolonos)   (BANAT NEWS)