Informant batok sa killer sa textmate gantihan

CEBU - Konseho sa dakbayan sa Mandaue mohatag og ganti sa informant sa pagkasulbad sa kaso sa kamatayon sa empleyado sa MEPZ nga napalgang patay sa Mandaue reclamation area sa milabay’ng semana.

Samtang girekomendar usab sa konseho ang spot promotions sa mga pulis nga naningkamot nga masulbad ug masikop ang mga suspetsado sa tulo ka dagkong krimen nga nahitabo sa unang bulan sa tuig 2009 sa maong dakbayan.

Matud pa ni Mandaue City Vice Mayor Carlo Pontico Fortuna pinaagi sa resolusyon ni Konsehal Emil Rosal ilang irekomendar sa kadagkuan sa Philippine National Police nga hatagan og "spot promotions" ang maong mga polis.

Usa na niini mao si Insp. George Aniñon, hepe sa Homicide Section lakip na ang iyang mga sakop sa Homicide Section, ingon man ang grupo sa Intelligence and Detective Management Branch nga 24-oras nagtukaw pagpangita sa suspek ug mga ebidensya alang sa kasulbaran sa maong mga kaso.

Sa linaing resolution ni Rosal, buot niyang mahatagan og ganti ang impormanteng migiya sa kapolisan nga nakasikop kang Julius Coton, suspek sa pagpatay kang Emily Nuñeza.

Makadawat unya og P10 mil ngadto sa P20 mil ang maong impormante nga maoy yawe sa pagkasikop ni Coton.

Nanghinaut ang mga opisyal sa konseho sa dakbayan sa Mandaue nga ingon unta niini ang kooperasyon sa katawhan ang gikinahanglan sa atong mga awtoridad sa pagsulbad ug pagsumpo sa krimen nga manghitabo.

Kahinumduman nga nasulbad na tanan sa MCPO ang tulo ka mga pagpatay nga pulos nabiktima kababayen-an nga sila si Ma. Jocelyn Mendoza, Lynn-Vi Ebarrita ug ang ulahi mao ang kang Nuñeza. (Bong Soriano)   (BANAT NEWS)