Gipusil sa bayaw angol

Giunay og pusil sa iyang bayaw ang 33-anyos nga PUJ drayber nga dugay na niyang gikabangi sa barangay Cagat siyudad sa Danao niadtong Domingo sa alas 6:30 sa gabii.

Ang biktima mao si Jovenal Castro, 33, usa ka PUJ drayber ug lumad nga taga barangay Ipil lungsod sa Carmen, samtang ang suspek mao ra usab ang iyang bayaw nga si Ryan Manipis, nagpuyo sa nahisgutang lugar.

Matud ni PO1 Marlon Remollo sa Danao City Police dihang nahinabi sa Banat News subay sa blotter nga gibasehan niini, ang biktima ug suspetsado dugay nang dunay panagbingkil nga maoy hinungdan sa maong panghitabo.

Matud pa nibisita ang biktima sa pinuy-anan sa suspek apan tungod sa ilang dugay nang panagbingkil nisampot kini sa pagpamusil sa suspek ug maayo nalang gani kay nakabantay ang biktima ug tuong paa lang ang naigo sa wala matinong kalibre sa armas.

Ang suspek daling nisibat samtang ang biktima gidala sa Danao City District hospital apan gi-transfer sa tambalanan dinhi sa dakbayan sa Sugbu. (Darrel Carumba)   (BANAT NEWS)