Ceres vs traysikad drayber na-kritikal

CEBU - Kritikal ang kahimtang sa usa ka traysikad drayber human kini maligsi og Ceres bus samtang namasahero kini didto sa highway sa Sitio Nangkaan, Perelos siyudad, sa Carcar niadtong Domingo sa alas 2 sa hapon.

Ang biktima nga nakaangkon og daghang mga samad ug pangos sa lainlaing bahin sa lawas mao si Gelly Duenas, 34, minyo, usa ka traysikad drayber ug nagpuyo sa nahisgutang lugar.

Samtang ang Ceres Bus nga nakaligis kaniya nagdala sa plaka nga GWK 751 nga gimaneho ni Rodrigo Regual, 49, minyo ug nagpuyo sa barangay Tubod, lungsod sa Barili.

Matud ni PO2 Paulino Sanchez sa Carcar City Police Station sa dihang nahinabi sa Banat News subay sa blotter nga gibasehan niini ang biktima medyo naka-inom kini nga namasahero niadtong tungora samtang ang Ceres Bus gikan sa habagatan nga bahin ug puno sa mga pasahero paingon sa siyudad sa Sugbu.

Daling gitabang sa mga estambay sa maong lugar ang biktima ug gihatod dayon sa Carcar District Hospital apan tungod sa seryoso nga kahimtang gibalhin dayon kini sa tambalanan dinhi sa dakbayan sa Sugbu.

Samtang ang drayber sa Ceres Bus boluntaryo kining mitahan sa iyang kaugalingon ug nagtingkagol na sa detention cell samtang nagpaabot sa tukmang kaso nga ipasaka batok niya. (Darrel A. Carumba)   (BANAT NEWS)