CEBU - Hugot nga nagpasalamat ang walo ka mga kongresista sa Sugbu ngadto sa International Police (Interpol) pinaagi sa ilang “joint statement”.
Kini subay usab sa gitakdang pagbiya sa mga sakop sa Interpol dinhi sa Sugbu nga nitabang pag-ila sa mga patay’ng lawas nga mga biktima sa bagyong Frank sa miaging tuig.
Partikular na niini ang mga patay’ng lawas gikan sa nalunod nga M/V Princess of the Stars didto sa Romblon atol sa paghuros sa nahisgutang bagyo.
Si Kongresista Antonio Cuenco sa habagatang distrito saludo sa gihimong pagtabang sa Interpol ingon man sa mga sakop sa Disaster Victim Identification (DVI).
Sa iyang bahin gihulagway usab ni Kongresista Raul del Mar sa amihanang distrito nga exceptional ang pagtabang sa Interpol pag-ila sa mga biktima sa bagyong Frank.
Samtang si Kongresista Eduardo Gullas sa unang distrito sa lalawigan hugot nga midayeg sa Interpol tungod sa mahinungdanon ug professional service niini ngadto sa mga Pilipino.
Sa iyang bahin, si Kongresista Pablo Garcia sa ikaduhang distrito sa lalawigan, mapasalamaton usab sa Interpol tungod sa dakong natabang niini paghupay sa nagbangutan nga mga pamilya.
Si Kongresista Pablo John Garcia mihulagway usab sa gihimo sa Interpol nga usa ka extraordinary service ug kini hugot niyang gipasalamtan.
Samtang si Kongresista Benhur Salimbangon sa ika-upat nga distrito hugot nga nagpasalamat ug midayeg sa katakos sa Interpol pagtabang pag-ila sa mga biktima sa trahedya.
Si Kongresista Ramon Durano VI miila usab sa mga sakop sa Interpol nga mga bag-ong bayani gawas sa tim-os nga pagpasalamat sa nahimong tabang niini.
Samtang si Kongresista Nerissa Soon Ruiz sa ika-unom nga distrito mitataw nga pinaagi sa mga sakop sa Interpol nahimong sayon ang pag-ila sa mga biktima sa bagyong Frank.
Dili mahulagway sa kongresista ang kalisod nga maagian sa nagkadaiyang ahinsya sa gobiyerno kung wala pa mohatag sa ilang kooperasyon ang Interpol. (Elly Bolonos) (BANAT NEWS)