Pagdugang og tuig sa kurso gisupak

Cebu - Gisupak sa mga tinun-an ug mga ginikanan ang tinguha sa Commission on Higher Education (CHED) nga pagdugang og tuig sa mga kurso sa kolehiyo.

Ang pipila ka mga ginikanan mipalanog niini sa Banat News kinsa miingon nga kun mahinayon kini hayan nga maglisod na sila pagpakab-ot og kurso sa ilang mga anak.

Gitumbok sa mga ginikanan nga dili na unta kini angayan pang himuon sa kagamhanan tungod kay nia na sa hilabihang kalisod sa panginabuhi ang katawhan karong panahona.

Matud pa nila nga sa upat ka tuig nga nursing, engineering ug uban pa daghan na kaayong mga maayong laki sa nasud nga nakahuman niini , ug gani ang uban dugay nang natun-as sa lubnganan .

Apan wala sila makasabot nganong niining panahon sa kalisod sa panginabuhi mao pa hinuoy pagdugang og tuig sa maong mga kurso diha sa kolehiyo.

Si Dr. Paulus Marie Canete, presidente sa Mandaue City College nga nagbase sa Eversely Child Sanitarium sa barangay Jagobiao sa maong dakbayan miingon nga iyang gisuportahan ang gipadayag nga pagsupak sa mga ginikanan.

Gipasabot niya nga dili ang pagdugang og laing tuig sa upat ka tuig nga kurso sa kolehiyo ang gikinahanglan kundi ang sistema sa pagpanudlo ug ang pagdugang og kahimanan sa tulunghaan maoy gikinahanglan aron labing mabaid ang pangutok sa mga estudyante inig graduwar nila sa ilang kurso. - Romeo T. Limpangog (BANAT NEWS)