Dasmagan sa hit and run kritikal

Cebu - Kritikal ang kahimtang sa usa ka lalaki human gidasmagan sa nag-hit and run nga Isuzu Elf ang gisakyan niining motorsiklo sa barangay Camandana lungsod sa Poro isla sa Camotes niadtong Sabado sa alas 6 sa gabii.

Ang biktima nga nalandig sa Ricardo Maningo Memorial Hospital sa lungsod sa San Francisco mao si Romeo Batidor, nagpuyo sa nahisgutang lugar.

Samtang nadakpan gihapon ang suspek nga drayber nga mi-hit and run nga Isuzu Elf nga walay plate number ug giilang si Obaldo Cartagena, 36, nagpuyo sa barangay Poblacion, San Francisco dihang gisubay sa kapolisan.

Subay sa imbestigasyon sa kapulisan, ang biktima gikan sa lungsod sa San Francisco paingon sa Poro samtang gikasugat niini ang maong trak gikan sa kasadpang bahin sa Poblacion, San Francisco paingon sa Poro.

Pagsugat nila sa nahisgutang lugar gidasmagan niini ang biktima hinungdan sa pagkatumba niini ug nalamba sa karsada, apan inay mohunong ang trak mipasirit hinuon kini.

Ang biktima daling gidala sa tambalanan samtang ang drayber sa trak gibalhog sa detention cell sa kapulisan sa Poro samtang nagpaabot sa tukmang kaso nga ipasaka batok niya. - Darrel Carumba (BANAT NEWS)