Mipatay sa 19 anyos nga mama ilhan na

Cebu - Nailhan na sa kapolisan sa Carmen Police Station ang suspetsadong mipatay sa usa ka 19 anyos nga inahan ug miangol sa 7 ka buwang anak niini didto sa sitio Pulang Yuta, Lower Natim-aoan, lungsod sa Carmen niadtong Sabado sa kaadlawon.

Si Police Inspector Carlos Reyes Jr., hepe sa kapolisan sa maong lungsod miila sa suspetsado nga mao si Ramil Molato, hingkod nga taga sitio Tagini, barangay Kaorasan lungsod sa Carmen kinsa usa ka mangunguling.

Ang suspetsado kinsa padayon pa karong gipangita sa kapolisan gituohan nga naibog kini kang Len Into, 19, ug tungod kay wala kini mosugot kaniya, iya nalang gilugos unya gipatay.

Ang nakitang ebedensya sa kapolisan mao ang T-shirt sa suspetsado nga nabulit sa dugo nga gisalibay didto sa likod sa iyang balay.

Gani nagtuo ang kapolisan nga nasamdan usab ang suspetsado kay malagmit natigbasan usab kini sa biktima, kay ang sundang nga gigamit sa maong krimen, iya man sa biktima.

 Nasayran nga sa wala pa mahitabo ang krimen, giingong ang suspetsado miuli sa ilang lugar ug iyang gibaligya ang iyang balay og P1,500 sa iyang silingan unya nakig-inom kini sa iyang mga barkada.

Sayo sa kaadlawon niadtong Sabado nakit-an sa mga silingan ang patay’ng lawas ni Into nga nagbuy-od sa hawanan sa ilang balay kansang usa ka bukton nagtungaytungay ug hapit na maputol ug ang tibuok kalawasan nabulit sa mga samad tinigbasan.

Ang iyang pito ka buwang anak nga si Rose Jaysinth samdan usab sa ulo ug gidala sa mga silingan ngadto sa tambalanan.

Ang bana sa biktima nga usa ka salesman wala diha sa ilang balay dihang gipatay ang iyang asawa.

Gituohan sa kapolisan nga nagtago-tago karon ang suspetsado sa mga lungsod sa Catmon ug Compostela kay tua didto ang mga paryente niini. -  BANAT NEWS