16 anyos giluba'g icepick namatay

Cebu - Usa ka 16-anyos nga batang lalaki ang napalgang patay ug natusak sa samad dinunggaban og icepick ang lawas kagahapon sa buntag diha sa kasagbutan sa bakanteng lote sa sitio Nazareno, barangay Mohon, dakbayan sa Talisay.

Ang biktima giila sa mga polis nga si Lenbert Campo, residente sa nahisgutang barangay.

Si PO1 Jundave David sa Homicide Section sa Talisay City Police Station sa pakighinabi niini sa Banat News kagahapon nagkanayon nga si Daisy Campo inahan sa biktima mibutyag nga kataposan niyang nakit-an ang anak niadtong Sabado sa hapon nga nananghid nga moduwa og basketball uban sa iyang mga higala.

Matud ni PO1 David nga wala mouli sa ilang balay si Lenbert sa maong adlaw apan wala na lang usab kini pangitaa tungod kay kanunay gyud kining dili mopauli sa ilahang balay ug anha matulog sa balay sa iyang suod nga higala nga si Jaymart Alcontin, 16, silingan usab sa biktima.

Gibutyag ni David nga ang mga kaduwa og basketball ni Lenbert ang nag-inom human sa duwa apan wala moapil kanila ang biktima tungod kay dili man mo-inom.

Ang kapolisan ang mipahigayon og follow-up nga imbestigasyon kabahin sa maong hitabo aron usab mailhan ang kriminal ug mahibaw-an ang motibo niini.

Matud usab ni David nga usa sa anggulo nga ilang gitan-aw mao nga gipareglahan ang biktima tungod kay bag-o lang kining namuyo diha sa lugar apan wala nila isalikway ang kabahin sa panagribal sa fraternity o gang.

Gikatakdang ipatawag sa kapolisan ang mga higala ug kaduwa sa batan-on aron makuhaan og mga pamahayag. - Brenda Batuto (BANAT NEWS)