Kababayen-an dili pakumpiyansahon - PNP

Cebu - Kadagkuan sa kapulisan sa lalawigan sa Sugbu nipahimangno sa publiko labi na niadtong mga kababayen-an nga magmabinantayon tungod sa report nga dunay grupo sa mga batan-ong magsakay og van nga manignit ug molugos og mga babaye dinhi sa probinsya.

Si Chief Insp. Elma Delos Santos, hepe sa Provincial Intelligence Branch (PIB) nga gikahinabi sa Banat News nagkanayon nga duna sila’y gisundang grupo sa mga batan-ong lalaki nga nalambigit sa krimen.

Kini gumikan sa nagsunod nga mga insidente sa mga krimeng ang kababayen-an maoy nangabiktima dinhi sa lalawigan, nunot niini giawhag sa kapolisan ang kababayen-an sa pag-amping.

Kini sama sa paglikay sa mangitngit nga dapit, kinahanglang may kaubang kasaligan kun molakaw panahon sa kagabhion ug di basta mo-entertain og mga text gikan sa wala mailhing tawo.

“Dili lang gyud mo- kumpiyansa ang publiko, labi na sa pagsakay og mga sakyanan bantayan kaayo nga posibleng manglingla ang mga kriminal mogamit sa mga sakyanan aron sa pagpamasahero aron makapangbiktima’g babaye,” sumala ni Delos Santos.

Wala usab nila isalikway ang posibilidad nga grupo kini sa mga batan-ong dunay fraternity nga mopahigayon sa ilang naandang initiation o ba kaha mga ritual. - Guam Logroño (BANAT NEWS)