Duha napusilan sa disko

Cebu - Duha ka mga batan-on ang napusilan angol atol sa disko sa managlahing dapit ning lalawigan niadtong miaging gabii.

Ang mga biktima mao sila si Rey (dili tinuod niyang ngalan) 16, nga taga Sitio Ibo, Barangay Hingatmonon, Balamban, ug Joner Batican, 18, taga sitio Guizo, barangay Sandayong, Danao City.

Si Rey kinsa nasabak sa walang bukton, didto mapusili sa diskohan sa sitio Checkpoint, barangay Lamesa, lungsod sa Balamban, samtang si Batican didto usab mapusili sa sitio Manlayag, barangay Patag, Danao City gikan sa diskohan.

 Ang suspetsadong mipusil kang Rey mao si Cordio Gabini, hingkod, nga taga barangay Bayon, Balamban, samtang ang nakaluthang kang Batican, wala pa hiilhi.

Sa wala pa mapusili si Rey giingong gibadlong niini si Gabini kinsa puwerting nakasayaw hangtod nga nasangkilan sa iyang siko ang kilid sa biktima.

Apan dihang gibadlong sa biktima giingong mihiwasa sa kasuko ang suspek dayong lanit sa armas de fuego niini ug gitirohan dayon ang biktima.

Samtang gidala sa tambalanan ang biktima nasikop usab dayon sa kapolisan si Gabini ug nagtingkagol na karon sa prisohan sa lungsod.

Samtang si Batican mikuyog sa iyang barkada sa pagpamauli sa ilang balay human sa disko sa ilang lugar, dihang gipusil kini sa usa sa grupo sa mga batan-ong nagpundok daplin sa karsada nga ilang naagian.

Human maigo si Batican, misirit usab dayon ang grupo nga namusil ug maoy gipangita karon sa kapolisan sa Danao City.  - Rica Calinawan (BANAT NEWS)