Press Freedom gihulga sa Congress

Cebu - Gikabalak-an nga sagubangon sa taga media sa nasud ang kahasol batok sa nag-ung-ong nga balaud nga mao ang “Right to Reply Bill” (RRB) nga maoy moyatak sa kagawasan ug katungod sa taga media sa pamalita.

Ang maong kabalaka gipadayag ni Manlalaban Ruphil F. Bañoc, ang tagdumala sa DYHP atol sa iyang pagpamulong isip pinasidunggang mamumulong ug nagpapanumpa sa mga opisyal sa Kapunongan sa mga Yanong Magsusulat ug Magsisibya (KAYAMM) didto sa Sacred Heart Center ning dakbayan sa Sugbu kagahapon sa buntag.

Gipasabot ni Bañoc nga ang RRB usa ka kalapasan sa Press Freedom kon kagawasan sa mga tigbalita sa pagpadayag sa mga kasayorang gusto nilang ibutyag sa sosyidad nga nahilatid sa Article 3, Section 4 sa Konstitusyon sa tuig 1987.

Matud pa ni Bañoc nga diha sa RRB makadikta na sa ilang gusto ang bisan kinsa nga mga tawo nga gustong motubag sa kontrobersiyang balita o komentaryo sa pamantalaan, radyo ug telebisyon nga maglambigit sa ilang ngalan, sa ilang gustong itubag.

Busa gihagit niya ang taga KAYAMM, ug uban pang kapunongan sa mga tigbalita sa radyo, pamantalaan ug TV sa paggama og resolusyon aron ipadayag ang sentimento batok sa maong balaudnon.

Matud pa ni Bañoc nga pirma nalang ni Presidente Gloria Macapagal-Arroyo ang gipaabot aron mahimong hingpit nga balaud ang maong balaudnon human ikapasar sa ikatulo ug katapusang pagbasa sa duha ka mga hawanan sa Kongreso.

Miingon si Bañoc nga sa higayong maaprobahan na ang maong balaud, dili na kabalibad ang editor sa balita sa gustong itubag ug kabutangang puwesto o lugar sa maong tubag diha sa pamantalaan, radyo ug telebisyon.

Kun nahimutang sa banner headlines sa pamantalaan ang usa ka kontrobersyal nga balita bahin sa usa ka tawo, kinahanglang sa tubag niya anha gihapon siya sa maong puwesto sa pamantalaan ibutang, ug ingon usab niini sa radyo, diin kun usa ka oras siyang gikomentaryohan, sa mao gihapong takna ug gidugayon siya manubag sa maong programa.

Kining maong sistema supak kaayo sa naandang pamaagi sa mga editor sa pamantalaan, radyo ug telebisyon, matud pa ni Bañoc.

Ang mga opisyal sa KAYAMM nga gipapanumpa ni Bañoc mao si Joel Solon, nga maoy presidente; bise presidente Wen Celen, Engr. Danny Madeja, Kalihim; Mamahandi, Marcelo T. Patiga; Nestor D. Arevalo, Tigsusipi; Tigsangyaw, Junalin Tamarra ug uban pa. - Wen Celen (BANAT NEWS)