Sikyu mihimakak sa report

Cebu - Gihimakak sa usa ka gwardya nga nakakita siya sa pagpusil-patay sa usa ka newsboy sa dalan Jose Rizal, barangay Poblacion 1 siyudad sa Carcar niadtong Biyernes sa ala una sa kaadlawon.

Ang maong gwardiya sa usa ka bangko duol sa crime scene mibakwi sa una niyang pamahayag sa kapolisan nga nakakita kini sa suspek sa pagpatay kang Felix Dialimas niadtong milabay’ng Biyernes sa kaadlawon.

Ang maong gwardiya mitawag dinhi sa Banat News ug nagkanayon nga wala siya makakita sa pagkahitabo tungod kay naghagok na siya og katulog niadtong higayuna.

Miangkon hinuon siyang nakadungog og buto apan wala niya kini panumbalinga gumikan sa iyang kahinanok ug miinsister nga layo ra sa nahitaboan ang iyang gikahimutangan nga gibana-bana niyang 25 metros.

Mipasabot siya nga pasado alas otso sa Huwebes sa gabii sa dayon na niyang katulog nakakita siya og lalaki nga nag-estambay diha sa dapit diin gipatay ang biktima, giklaro usab niyang wala siya makaklaro sa dagway niini.

Usa ka lalaking nangangkong maoy manager sa gitrabahoang bangko sa maong gwardiya mipadayag usab sa kabalaka sa seguridad sa iyang gwardiya ug sa ilang bangko human mogawas ang maong balita.

Apan si SPO3 Ruben Reynes sa Carcar Police Station nga gikahinabi sa Banat News kagahapon nagkanayon nga base sa ilang blotter ang maong gwardiya maoy nahinabi sa mga imbestigador, apan misabot kini nga posibleng nabalaka kini sa iyang seguridad.

“Kung mo-deny siya iyaha sad na, pero kining ato diri (blotter) version man ni sa mga polis nga didto sa lugar,” pagklaro pa ni Reynes. - Lesley Caminade (BANAT NEWS)